मुख्यमंत्री ह तुरंते जंगल कटाई म रोक लगाय, अवैध वन कटाई अऊ फर्जी ग्राम सभा के जांच कराए अउ परियोजना ले संबंधित काम मन म रोक लगाये के निर्देश दीन
रायपुर, छत्तीसगढ़ के दंतेवाड़ा जिला के ग्राम हिरोली म एन.एम.डी.सी. बैलाडीला लौह अयस्क खान परियोजना दंतेवाड़ा के डिपाजिट 13 के संबंध म आज मंत्रालय म बस्तर लोकसभा क्षेत्र के सांसद श्री दीपक बैज अऊ पूर्व केंद्रीय मंत्री श्री अरविंद नेताम के नेतृत्व म बस्तर ले आए प्रतिनिधि मंडल ह मुख्यमंत्री श्री भूपेश बघेल ले मुलाकात करिन। मुलाकात के समय बस्तर के आन विधायक घलोक उपस्थित रहिन। मुख्यमंत्री ह प्रतिनिधि मंडल के बात मन ल पूरा गंभीरता अऊ संवेदनशीलता ले सुनिन अऊ कहिन कि ए मामला म राज्य शासन के जऊन भूमिका हे, ओला निभाये जाही। ए अवसर म राज्य शासन के वन मंत्री मोहम्मद अकबर घलोक उपस्थित रहिन।
मुख्यमंत्री ह कहिन कि प्रतिनिधि मंडल के संग ए क्षेत्र म अवैध रूप ले वन मन के कटाई के शिकायत के जांच करे जाही अउ नियमानुसार जरूरी कार्रवाई करे जाही। अइसनहे प्रभावित क्षेत्र म वन कटाई के काम तुरंते रोके जाही। मुख्यमंत्री ह कहिन कि संबंधित क्षेत्र म परियोजना ले संबंधित संचालित कार्य मन म घलोक रोक लगाये जाही। प्रतिनिधि मंडल ह बताइस कि खदान हस्तानांतरण आदि प्रक्रिया म ‘पंचायत स्तर म विस्तार के कानून अधिनियम 1996 (पेसा)‘ के तहत साल 2014 म कराए गए ग्राम सभा के पालन नइ करे गए हे अउ फर्जी रूप ले ग्राम सभा आयोजित करे गए हे। मुख्यमंत्री ह प्रतिनिधि मंडल ल आश्वस्त करिन कि फर्जी ग्राम सभा के आरोप के जांच कराये जाही। मुख्यमंत्री ह प्रतिनिधि मंडल के मांग म कहिन कि संबंधित विषय मन म भारत सरकार ले पत्राचार करे जाही अऊ जनभावना के घलोक जानकारी दे जाही। मुख्यमंत्री ह स्पष्ट करिन के राज्य शासन अपन क्षेत्राधिकार के कार्रवाई करही फेर खदान म आधिपत्य अउ मालिकाना भारत सरकार के एन.एम.डी.सी. के हे अऊ ओ मन ल ही खदान के संबंध म कोनो निर्णय लेहे के अधिकार हे।
प्रतिनिधि मंडल ह ए क्षेत्र के निवासी मन कोति ले एन.एम.डी.सी. अउ सी.एम.डी.सी. कोति ले अडानी इंटरप्राईसेस के माध्यम ले माईनिंग काम के विरोध के जानकारी दीन अऊ इहां के आदिवासी मन के जनभावना, स्थिति अऊ मुद्दा मन के जानकारी दीन। प्रतिनिधि मंडल ह अपन मांग उपर आधारित एक ज्ञापन घलोक मुख्यमंत्री ल सौंपिन। उमन मुख्यमंत्री ल प्रतिनिधि मंडल के बात म तुरंते सकारात्मक पहल करे बर धन्यवाद घलोक दीन। प्रतिनिधि मंडल म विधायक सर्वश्री मोहन मरकाम, रेखचन्द जैन, विक्रम मंडावी, पूर्व विधायक देवती कर्मा, इंटक के प्रतिनिधि डी.के. देशमुख, सर्व आदिवासी समाज के नवल किशोर मंडावी घलोक उपस्थित रहिन। ए अवसर म अपर मुख्य सचिव श्री सी. के.खेतान, आर.पी. मंडल, मुख्यमंत्री के सलाहकार श्री राजेश तिवारी, मुख्यमंत्री के प्रमुख सचिव श्री गौरव द्विवेदी, प्रधान मुख्य वन संरक्षक श्री राकेश चतुर्वेदी घलोक उपस्थित रहिन।
