समूह के महिला मन बनावत हें सेनेटरी नेपकिन: निःशुल्क वितरण घलोक
रायपुर, छत्तीसगढ़ के दूरस्थ अऊ आदिवासी बहुल दंतेवाड़ा जिला जऊन नक्सली हिंसा के दंश झेलत हे, उन्हां शिक्षा अऊ स्वास्थ्य के क्षेत्र म पिछड़े होए के सेती भारत सरकार कोति ले एला आकांक्षी जिला के रूप म घलोक चुने गए हे। इहां विशेषकर ग्रामीण परिवेश के अधिकांश महिला मन स्वास्थ्य के प्रति जागरूक नइ होए अऊ लोक-लाज के सेती मासिक धर्म के समय सेनेटरी नेपकिन के उपयोग नइ करंय। स्वास्थ्य अऊ स्वच्छता के संग गहराई ले जुड़े ये समस्या ले निजात पाय बर जिला प्रशासन अऊ एनएमडीसी कोति ले कारपोरेट सोशल रिस्पांसबिलिटी (सीएसआर) के माध्यम ले अभिनव कार्यक्रम प्रारम्भ करे गए हे। एकर नाम ‘मेहरार चो मान’ अर्थात् ‘महिलाओं के सम्मान’ हे।
‘मेहरार चो मान’ कार्यक्रम के उद्देश्य महिला मन म स्वास्थ्य के प्रति जागरूकता लाना अऊ मासिक धर्म के समय सेनेटरी नेपकिन के उपयोग कराना हे। अभी हाले म दंतेवाड़ा जिला के दू विकासखण्ड मन म महिला स्वसहायता समूह के माध्यम ले सेनेटरी नेपकिन तियार करे के काम चालू करे गए हे। समूह के महिला मन खुद सेनेटरी पैड निर्माण करत हें अऊ ग्रामीण महिला मन ल एखर उपयोगिता समझात एकर निःशुल्क वितरण घलोक करत हें। स्वास्थ्य विभाग, महिला अऊ बाल विकास विभाग अऊ राष्ट्रीय ग्रामीण आजीविका मिशन कोति ले चुने गे गांव मन महिला मन ले चर्चा करके ओ मन ल प्रेरित करे के काम घलोक करे जावत हे। अभी हाल म स्कूल, आश्रम, पोटा केबिन के बालिका मन के संगें-संग ग्रामीण महिला मन ल निःशुल्क सेनेटरी पैड के वितरण करे जात हे।
कलेक्टर श्री टोपेश्वर वर्मा ह बताइस कि महिला मन म स्वास्थ्य के प्रति जागरूकता बढ़ाय अऊ जीविकोपार्जन के अकतहा साधन मुहैय्या कराए के ये योजना के तहत जिला के पांच केन्द्र मन म करीबन 45 महिला मन कोति ले हर महीना 11 हजार सेनटरी पैड पैकेट बनाए के काम करे जावत हे। ये काम ले समूह के महिला मन औसतन करीबन 4 हजार रूपिया के अकतहा आय घलोक अर्जित करत हें। कार्यक्रम के सफलता अऊ महिला मन के बीच एखर स्वीकार्यता ल देखत अब ये कार्यक्रम ल अऊ जादा विस्तार देवत दू आन विकासखण्ड मन म चालू करे के उदीम हे। ए विकासखण्ड मन म 8 महिला स्व सहायता समूह मन कोति ले सेनेटरी नेपकिन बनाये जाही। ए उदीम ले जिला के सबो महिला मन ल एक साल तक सेनेटरी नेपकिन के निःशुल्क वितरण करे जाही।