घर पहुंच के पेंशन के संग बांटत हें खुसी
दन्तेवाड़ा, 27 जून 2020। जिला म कोरोना वायरस वैश्विक महामारी के बेरा म दंतेश्वरी माई मितान ह हितग्राही मन के घर पहुंच के बैंक संगवारी तुमचो दुवार योजना के माध्यम ले नगद भुगतान करत हें। ये दिशा म जिला के युवा कलेक्टर श्री दीपक सोनी, के पहल ले जिला के चितालंका अऊ नकुलनार ले एखर शुरुआत होए हे अऊ अब पूरा जिला म एला कारगर ढंग ले सुनिश्चित करे जात हे। जानबा हे के कलेक्टर श्री सोनी ह पद ग्रहण करतेच जिला म गरीबी उन्मूलन बर काम करना शुरू कर देहे हे। ओखर मुख्य लक्ष्य इहां के निवासी मन के आर्थिक सामाजिक स्तर म सुधार करके ओ मन ल सक्षम बनाना हे। उंखर सकारात्मक पहल के फल स्वरुप सामाजिक सहायता कार्यक्रम के पेंशन हितग्राही मन ल पेंशन बर बैंक के चक्कर झन लगाय ल परय ना हीं मनरेगा ले मिलइया मजदूरी बर भटकना परही। जिला के समाज कल्याण विभाग के कई ठन पेंशन योजना मन के 18 हजार 9 सौ 95 पेंशन धारी अऊ एनआरएलएम के हितग्राही मन बर घर पहुंच बैंक सेवा शुरू करे गए हे। ये पहल ले सबले जादा राहत बुजुर्ग, महिला मन के अलावा दिव्यांग मन ल मिले हे। वीएलई, बैंक सीएसपी, सीएससी, बैंक सखी अउ लोक सेवा केन्द्र के संग ये सेवा शुरू करे गए हे।
जिला म अब तक ’’बैंक संगवारी तुमचो दुआर’’ योजना के तहत ’’दंतेश्वरी माई मितान’’ कोति ले करीबन 7 हजार 2 सौ 58 हितग्राही मन ल घर पहुंचके 37 लाख रुपए के नगद भुगतान करे गए हे। जिला म भविष्य म सबो पंचायत मन म हितग्राही मन ल ये सेवा के संग घर पहुंचके पेंशन के संग मजदूरी के भुगतान घलोक करे जाही।
