दंतेवाड़ा, 12 जुलाई 2024। मचान विधि ले किसान मन ल सब्जी के फसल लेहे बर प्रेरित करे मिशन बिहान अंतर्गत जिला दंतेवाड़ा मे 1000 दीदी मन के बारी म मचान बनाए के काम करे जात हे।
मचान अधिकतर बाडी मन म बनाय जात हे। लता या बेल वाले सब्जी ल सहारा देहे बर मचान विधि के उपयोग करे जाथे। गांव के अधिकतर घर म जिहां सब्जी उगाए जाथे उहां आप मचान नइ त ढेंखरा देख सकत हव। गांव के किसान परिवार अपन सुविधा अऊ मौसम के मुताबिक अपन बारी अऊ खेत मन म भिंडी (रमकेरिया), कुम्हड़ा (कोंहड़ा), भांटा, करेला, लौकी (तूमा), कई प्रकार के सब्जी आदि लगाथें। ए कड़ी म दंतेवाड़ा जिला के ग्राम पंचायत कुपेर के स्व सहायता समूह के दीदी श्रीमती झुनकी यादव के मकान के 3.8 डिसमिल जमीन म ’’मचान विधि’’ ले करेला लगाय बर नर्सरी बेड तैयार करे गए हे। दंतेवाड़ा जिला के किसान मन के रुझान हमेसा जैविक कृषि कोति रहे हे जेखर सेती मिशन बिहान के तहत ग्रामीण क्षेत्र मन म जैविक सब्जी अउ जैविक खेती ल बढ़ावा देहे बर जिला के अंतर्गत 1000 दीदी मन के बारी मन म ’’मचान’’ विधि ले सब्जी उत्पादन के लक्ष्य रखे गए हे। जिहां ओ मन मचान विधि ले सब्जि के उत्पादन करके आर्थिक रूप ले आत्मनिर्भर घलोक बन सकही। कृषि अउ उद्यान विभाग कोति ले आन दीदी मन के घर के बारी मन म इही विधि ले सब्जी लगाय ल प्रेरित करे जात हे।