दंतेवाड़ा, 21 अप्रैल 2020। कोरोना वायरस (कोविड-19) के संक्रमण के रोकथाम बर करे गए देशव्यापी लॉकडाउन के बेरा म मुख्यमंत्री श्री भूपेश बघेल ह अधिकारी मन ल निर्देश देहे हें के लॉकडाउन के बेरा म कोनो मनखे ल भोजन, खाद्यान्न अऊ रोजमर्रा के जरूरी चीज मन के अभाव नइ होना चाही। मुख्यमंत्री के निर्देश के मुताबिक दंतेवाड़ा जिला प्रशासन ह जरूरतमन्द मनखे मन ल सामाजिक संगठन, स्वयंसेवी संस्था, कर्मचारी संगठन अऊ आन दानदाता मन के सहयोग ले राशन अऊ आन खाद्य सामान निःशुल्क प्रदान करत हे।
जिला प्रशासन ह ये दिशा म जिला स्तरीय खाद्यान्न बैंक स्थापित करे हे। एखरे संग एनएमडीसी बचेली अऊ किरन्दुल परियोजना ह घलोक जिला प्रशासन के संग समन्वय करके निर्धन, जरूरतमन्द मनखे मन ल खाद्यान्न अउ आन जरूरी खाद्य देवत हे। इही कड़ी म एनएमडीसी बचेली परियोजना ह शासकीय दंतेश्वरी पीजी कॉलेज दन्तेवाड़ा के 15 छात्र-छात्रा मन ल निःशुल्क राशन अऊ आन खाद्य सामान प्रदान करिस। ये बेरा कलेक्टर श्री टोपेश्वर वर्मा अऊ सीईओ जिला पंचायत श्री सच्चिदानंद आलोक संग उप महाप्रबंधक बचेली श्री सुनील उपाध्याय ह ए छात्र-छात्रा मन ले रूबरू होके उंखर दिक्कत मन के बारे म पूछिन अऊ संकट के घड़ी म हरसंभव मदद देहे बर ए छात्र-छात्रा मन ल आश्वस्त करिन। उहें ओ मन ल धैर्य के संग लॉक डाउन के पालन करे के संग अपन बीच म सोशल डिस्टेंस बनाके रखे अउ मास्क के प्रयोग अनिवार्य रूप ले करे के समझाईश दीन।
