रायपुर, 16 दिसम्बर 2020। प्रदेश म होवइया छत्तीसगढ़ बोर्ड परीक्षा मन बर आवेदन करे के तिथि बढ़ा देहे गए हे। कक्षा 10वीं अऊ कक्षा 12वीं के बोर्ड परीक्षा म शामिल होवइया विद्यार्थी अब 31 दिसंबर तक आवेदन कर सकही।
दरअसल कोरोना ल देखत हुए माध्यमिक शिक्षा मंडल ह अहम फैसला लेवत हुए तारीख ल 15 दिसंबर ले बढ़ा के 31 दिसंबर कर देहे हे। विद्यार्थी निर्धारित शुल्क के संग ऑनलाइन माध्यम ले माध्यमिक शिक्षा मंडल के साइट म परीक्षा फॉर्म जमा कर सकत हे।
बतादन कि एखर पहली नियमित विद्यार्थी मन बर आवेदन करे के अंतिम तिथि 15 दिसंबर रिहिस अऊ प्राइवेट विद्यार्थी मन बर विलंब शुल्क के संग अंतिम तिथि 31 दिसंबर रखे गए रिहिस। लेकिन अब नियमित विद्यार्थी ल घलो 31 दिसंबर तक के छूट देहे गए हे। एखर संग ही कक्षा 9वीं के परीक्षार्थी मन के पंजीयन बर आवेदन पत्र जमा करे के तिथि घलो 31 दिसंबर कर देहे गए हे।