दाऊ भूपेश बघेल संहरईस अउ दीस बधई

रइपुर, 23 जून 2022। बड़का खुशी अउ संहरई के बात ये हे कि छत्तीसगढ़ म चलत भुइयां कार्यक्रम ल राष्ट्रीय स्तर के पुरस्कार मिले हवय। आयुक्त भू-अभिलेख कोति ले चलत लैंड रिकॉर्ड्स प्रोजेक्ट, भुइयां सॉफ्टवेयर ल मुंबई म होए एक ठो सुग्घर समारोह म प्रतिष्ठित आईएमसी डिजिटल अवार्ड्स 2021 ले सम्मानित करे गे हवय। सरकारी क्षेत्र म सुग्घर बूता बर ये पुरस्कार कार्यालय आयुक्त भू-अभिलेख अउ राष्ट्रीय सूचना विज्ञान केंद्र ल देहे गे हवय।
मुख्यमंत्री दाऊ भूपेश बघेल अउ राजस्व मंत्री श्री जयसिंह अग्रवाल ह भू-अभिलेख विभाग अउ राष्ट्रीय सूचना विज्ञान केंद्र ल ये पुरस्कार अब्बड़ अकन बधई अउ शुभकामना दिस हवयं।
जानबा होवय कि राज्य म भू-अभिलेख ल डिजिटाइज करके लोगन ल ऑनलाइन के माध्यम ले सहज रूप म उपलब्ध कराए खातिर भुइयां कार्यक्रम बनाए गे हवय। ये भुइयां सॉफ्टवेयर नक्शा, खसरा अउ ओकर ले जुरे जमीन के कागजात मन ल ऑनलाइन प्रस्तुत करे के संगे-संग संपत्ति के रजिस्ट्री एकीकृत करत डुप्लीकेट रजिस्ट्री के समस्या के समाधान तको करथे। ये भुइयां कार्यक्रम राजस्व विभाग के प्रक्रिया म पारदर्शिता लाने के माध्यम हरे। येमें डिजिटल रूप ले हस्ताक्षर करे हुए 4 करोड़ कागजात ऑनलाइन उपलब्ध हवय। ये सॉफ्टवेयर म प्रोजेक्ट म विभाग मनके प्रमुख अधिकारी, राजस्व, खाद्य, कृषि, एनसीपीआई, मृदा स्वास्थ्य, वाणिज्यिक कर, टाउन एंड कंट्री प्लानिंग अउ कतकोन अकन आने विभाग मन के सचिव अउ जिला कलेक्टर, एसडीएम, तहसीलदार, राजस्व निरीक्षक मन के लॉग इन आईडी बनाए गे हवय। अउ 3800 ले जादा बैंक ल भुइयां संग एकीकृत करे गे हवय, जेकर ले कोनो भूमि के डुप्लिकेट ऋण देहे जाए ले थाम्हे जा सकय। ये पुरस्कार ल एनआईसी के वैज्ञानिक श्री सौरभ दुबे ह प्रतिनिधि के रूप म ग्रहण करीन।