खाद्य मंत्री श्री बघेल ह मूढ़ीपार मेला के करिन शुभारंभ

बिलासपुर, 03 फरवरी 2024। खाद्य नागरिक आपूर्ति अउ उपभोक्ता संरक्षण विभाग के मंत्री श्री दयाल दास बघेल आज बिलासपुर जिला के ग्राम मूढ़ीपार म सतनामी समाज कोति ले आयोजित दू दिन के मेला के शुभारंभ करिन। ए बेरा म बिल्हा विधायक श्री धरमलाल कौशिक अऊ मुंगेली विधायक श्री पुन्नू लाल मोहले अउ आन जनप्रतिनिधिगण उपस्थित रहिन।
मंत्री श्री बघेल ह संबोधित करत कहिन कि बाबा गुरूघासीदास ह मनखे-मनखे एक समान के संदेश देहे हें। एखर जरिए हम सब आपस म मिलजुल के एक रहन। उमन कहिन कि किसान मन ल अब धान बेचे बर कोनो परेशानी नइ होवय। मुख्यमंत्री श्री विष्णु देव साय ह 4 फरवरी तक धान बेचे बर तारीक बढ़ा दे हे। सनिच्‍चर अऊ इतवार के घलोक किसान अपन धान आसानी ले बेच सकहीं। उमन कहिन कि छत्तीसगढ़ सार्वजनिक वितरण प्रणाली के अंतर्गत अभी हाल म प्रचलित सबो 77 लाख राशन कार्ड के नवीनीकरण के काम 25 जनवरी ले जारी हे। राशनकार्ड धारी हितग्राही खाद्य विभाग के नवा मोबाईल एप्प के संग नवीनीकरण बर ऑनलाइन आवेदन 15 फरवरी तक प्रस्तुत कर सकत हें। अइसन हितग्राही जिंकर पास एंड्राईड मोबाईल नइ हे या जहां मोबाईल कनेक्टिविटी नइ हे। ओ हितग्राही मन शासकीय उचित मूल्य के दुकान (पीडीएस) म जाके ऑनलाईन प्रक्रिया म राशनकार्ड के नवीनीकरण बर अपन आवेदन प्रस्तुत कर सकत हें।