स्वच्छ भारत मिशन कोति ले कई ठन श्रेणी मन म कुल 4.34 करोड़ रुपिया के देहे जाही पुरस्कार
रायपुर, 26 अगस्त 2020। राज्य स्वच्छ भारत मिशन (ग्रामीण) ह अवइया 2 अकटूबर के जउन कई ठन श्रेणी मन म पुरस्कार देहे जाथे तेकर बर आवेदन भेजे के आखरी तारीक ल बढ़ा देहे हे। अब ये पुरस्कार बर 31 अगस्त तक आवेदन करे जा सकही। एकर पहिली एखर बर आखरी तारीक 23 अगस्त निरधारित करे गए रहिस। गांव मन म ओडीएफ स्थायित्व बनाए रखे अऊ स्वच्छता के अच्छा आदत मन ल बढ़ावा देहे बर मिशन कोति ले कई श्रेणी मन म कुल चार करोड़ 34 लाख रुपिया के पुरस्कार देहे जाही। ए पुरस्कार मन बर जादा ले जादा ग्राम पंचायत, संस्था विकासखंड अऊ जिला मन ल आवेदन के मौका देहे बर प्रविष्टि भेजे के आखरी तारीक बढ़ाए गए हे। चुने गए विजेता मन ल राष्ट्रपिता महात्मा गांधी के जयंती 2 अकटूबर के पुरस्कार देहे जाही।
ये 15 श्रेणी मन म देहे जाही पुरस्कार-
राज्य स्वच्छता पुरस्कार-2020 के तहत ’स्वच्छ सुंदर शौचालय पुरस्कार’ के हर एक विजेता हितग्राही ल 5001 रूपिया के पुरस्कार दे जाही। एखर बर जिला स्तर म दस-दस हितग्राही मन के चयन करे जाही। ’स्वच्छ सुंदर सामुदायिक शौचालय पुरस्कार’ जिला अऊ राज्य स्तर म देहे जाही। जिला स्तर के विजेता ग्राम पंचायत ल 21 हजार रूपिया अऊ राज्य स्तरीय विजेता पंचायत ल एक लाख रूपिया के पुरस्कार राशि देहे जाही। राज्य स्तर म ’उत्कृष्ट सेग्रिगेशन शेड’ बर चुने गए ग्राम पंचायत ल एक लाख रूपिया देहे जाही। ’माहवारी स्वच्छता प्रबंधन’ बर दो श्रेणी मन म विजेता मन के चयन करे जाही। जिला स्तर के विजेता पंचायत ल 21 हजार रूपिया अऊ राज्य स्तरीय विजेता ल 51 हजार रूपिया के पुरस्कार ले नवाजे जाही।
पढ़ईया लईका मन म घलोक स्वच्छता के प्रति जागरूकता लाय बर स्कूल मन के माध्यम ले ’उत्कृष्ट निबंध सृजन प्रतियोगिता’ आयोजित करे जाही। जिला स्तर म पूर्व माध्यमिक अऊ हाईस्कूल दू अलग-अलग वर्ग म आयोजित ये प्रतियोगिता के दुनों वर्ग के विजेता मन ल 21 हजार रूपिया, 11 हजार रूपिया अऊ पांच हजार रूपिया के क्रमशः पहिला, दूसरा अऊ तीसरा पुरस्कार देहे जाही। जिला स्तर म आयोजित ’उत्कृष्ट नारा लेखन प्रतियोगिता’ के तीन विजेता मन ल 21 हजार रूपिया, 11 हजार रूपिया अऊ पांच हजार रूपिया के पुरस्कार राशि देहे जाही। ’दीवार लेखन प्रतियोगिता’ के तहत जिला स्तर म स्वच्छाग्रही या स्वसहायता समूह के भाग लेवईया मन ले दस सर्वश्रेष्ठ लेखन बर हर एक ल पांच हजार रूपिया के पुरस्कार दे जाही।
’प्लास्टिक मुक्त ग्राम पंचायत’ ल जिला अऊ राज्य स्तर म पुरस्कृत करे जाही। जिला स्तरीय विजेता ल 21 हजार रूपिया अऊ राज्य स्तरीय विजेता ल एक लाख रूपिया के पुरस्कार प्रदान करे जाही। स्वच्छ भारत मिशन के अंतर्गत काम करत स्वसहायता समूह मन म ले ’उत्कृष्ट स्वच्छाग्रही समूह पुरस्कार’ के जिला स्तरीय विजेता ल 21 हजार रूपिया अऊ राज्य स्तरीय विजेता ल 51 हजार रूपिया के पुरस्कार राशि देहे जाही। राज्य स्तर म ’उत्कृष्ट बायोगैस संयंत्र पुरस्कार’ के विजेता ग्राम पंचायत ल 51 हजार रूपिया देहे जाही। एस.ई.सी.एल. के सहायता ले संचालित ’दिव्यांग मन बर सामुदायिक शौचालय निर्माण’ के पायलट परियोजना के अंतर्गत तीन सर्वश्रेष्ठ ग्राम पंचायत मन ल क्रमशः ढाई लाख रूपिया, डेढ़ लाख रूपिया अऊ एक लाख रूपिया के पुरस्कार ले नवाजे जाही।
’सामुदायिक शौचालय के उत्कृष्ट ड्राइंग-डिजायन प्रतियोगिता’ के तहत तीन वर्ग म पुरस्कार देहे जाही। राज्य स्तरीय ये प्रतियोगिता म साढ़े तीन लाख रूपिया, साढ़े चार लाख रूपिया अऊ साढ़े पांच लाख रूपिया लागत के सामुदायिक शौचालय के उत्कृष्ट ड्राइंग-डिजाइन प्रस्तुत करइया एक-एक आर्किटेक्ट या इंजीनियर ल 51 हजार रूपिया के पुरस्कार प्रदान करे जाही। ’सेग्रिगेशन शेड के उत्कृष्ट ड्राइंग-डिजाइन’ बनइया तीन विजेता मन ल राज्य स्तर म क्रमशः 21 हजार रूपिया,11 हजार रूपिया अऊ पांच हजार रूपिया के पुरस्कार देहे जाही। ’गांव ल स्वच्छ बनाए बर सर्वश्रेष्ठ कार्ययोजना (बेस्ट वर्किंग प्लान)’ के सुझाव देवइया तीन मनखे मन ल क्रमशः 21 हजार रूपिया,11 हजार रूपिया अऊ पांच हजार रूपिया के पुरस्कार प्रदान करे जाही। अइसनहे ’ग्रामीण स्वच्छता के संबंध म सर्वश्रेष्ठ नवाचार’ के सुझाव देवइया तीन भाग लेवईया मन ल क्रमशः 21 हजार रूपिया,11 हजार रूपिया अऊ पांच हजार रूपिया के पुरस्कार देहे जाही।
ए प्रतिस्पर्धात्मक पुरस्कार मन के संगेच प्रदेश के एक जिला ल एक करोड़ रूपिया के स्वच्छता स्थायित्व पुरस्कार, तीन विकासखंड मन ल 50-50 लाख रूपिया अऊ पांच ग्राम पंचायत मन ल 20-20 लाख रूपिया के पुरस्कार प्रदान करे जाही। प्रविष्टि निरधारित प्रारूप म आवेदन अऊ फोटो के संग संबंधित जनपद पंचायत के माध्यम ले भेजे जा सकत हे।
सामुदायिक शौचालय के उत्कृष्ट ड्राइंग-डिजायन प्रतियोगिता, सेग्रिगेशन शेड के उत्कृष्ट ड्राइंग-डिजाइन प्रतियोगिता, गांव ल स्वच्छ रखे बर सर्वश्रेष्ठ कार्ययोजना (बेस्ट वर्किंग प्लान) अऊ ग्रामीण स्वच्छता के संबंध म सर्वश्रेष्ठ नवाचार के सुझाव बर प्रविष्टि स्वच्छ भारत मिशन (ग्रामीण) के राज्य कार्यालय ल भेजना होही। अलग-अलग पुरस्कार मन बर मिले प्रविष्टि मन के अंतर्विकासखंड दल, अंतर्जिला दल अऊ राज्य स्तरीय दल या एजेंसी मन भौतिक सत्यापन करहीं तेकर बाद विकासखंड स्तरीय, जिला स्तरीय अऊ राज्य स्तरीय पुरस्कार चयन समिति ह विजेता मन के चयन करही।