रायपुर, 30 अगस्त 2021। मुख्यमंत्री निवास म आज श्री कृष्ण जन्माष्टमी के पपरब उछाह के संग मनाए गीस। मुख्यमंत्री श्री भूपेश बघेल ह मंत्रोच्चार के बीच विधि-विधान ले भगवान श्री कृष्ण जी के पूजा-अर्चना करके प्रदेशवासी मन के सुख, समृद्धि अऊ खुशहाली के कामना करिन।
संस्कृति विभाग कोति ले आयोजित ये कार्यक्रम म राजधानी रायपुर के कोपलवाणी विद्यालय के मूक-बधिर लइका मन श्री कृष्ण अऊ राधा के वेशभूषा म सामिल होइन। ये बेरा म छत्तीसगढ़ राज्य वनौषधि पादप बोर्ड के उपाध्यक्ष श्री छविन्द्र कर्मा, संस्कृति विभाग के संचालक श्री विवेक आचार्य संग बहुत अकन अधिकारी-कर्मचारीगण घलोक उपस्थित रहिन। मुख्यमंत्री ह लइका मन ल तिलक लगाके मिठाई खवाईन।
कोपलवाणी विद्यालय के प्राध्यापिका डॉ. प्रीति उपाध्याय ह बताइस के ये कार्यक्रम म कक्षा 1 ले लेके स्नातक स्तर के लइका सामिल होइन। उमन बताइन के विद्यालय म सबो लइका मन ल नृत्य, पेंटिंग अऊ ड्रॉइंग के विधा मन म घलोक प्रशिक्षित करे जात हे। एखर पहिली विद्यालय के लइका मन मुख्यमंत्री जी ल अपन हाथ ले बने उंखर पेंटिंग घलोक उपहार स्वरूप भेंट करे हें।
मुख्यमंत्री निवास म उछाह के संग मनाए गीस आठे कन्हैया के परब: कोपलवाणी विद्यालय के मूक-बधिर लइका मन श्री कृष्ण अऊ राधा के वेशभूषा म सामिल होइन
