मंत्रिपरिषद के निर्णय दिनांक – 30 जुलाई 2025

मुख्यमंत्री श्री विष्णु देव साय के अध्यक्षता म आज इहां मंत्रालय महानदी भवन म आयोजित कैबिनेट के बैठक म बहुत अकन महत्वपूर्ण निर्णय लेहे गीस –
1) मंत्रिपरिषद ह भारत सरकार के खान मंत्रालय के नवा दिशा-निर्देश अऊ प्रधानमंत्री खनिज क्षेत्र कल्याण योजना (PMKKKY)-2024 के संशोधित गाईडलाईन्स के मुताबिक छत्तीसगढ़ जिला खनिज संस्थान न्यास नियम, 2015 म जरूरी संशोधन करे के निर्णय लीस।
एखर से न्यास तीर उपलब्ध राशि के 70 प्रतिशत राशि के व्यय उच्‍च प्राथमिकता वाले क्षेत्र जइसे पेयजल आपूर्ति, पर्यावरण संरक्षण, प्रदूषण नियंत्रण, स्वास्थ्य, शिक्षा, कृषि, महिला अऊ बाल कल्याण, सियान अऊ निःशक्तजन के कल्याण के संगेच कौशल विकास अऊ रोजगार, स्वच्छता, घर, पशुपालन के पूरा विकास म करे जाही।
2) मंत्रिपरिषद ह सादा रेत के उत्खनन अऊ परिवहन म प्रभावी नियंत्रण अऊ रेत के उत्खनन अऊ नियमन म पारदर्शिता लाय के उद्देश्य ले छत्तीसगढ़ गौण खनिज सादा रेत (उत्खनन अऊ व्यवसाय) नियम 2019 अऊ छत्तीसगढ़ गौण खनिज सादा रेत उत्खनन अऊ व्यवसाय (अनुसूचित क्षेत्र हेतु) नियम 2023 ल निरसित करत नवा नियम ‘‘छत्तीसगढ़ गौण खनिज सादा रेत (उत्खनन अऊ व्यवसाय) नियम-2025‘‘ के अनुमोदन करिस।
एखर से रेत के अवैध उत्खनन अऊ परिवहन ल रोके के बर कड़ा कदम उठाए जाही, जेखर से आम जनता ल उचित कीमत म रेती उपलब्ध हो सकही। संगेच रेत उत्खनन म पर्यावरण अऊ सुरक्षा मानक मनके सख्ती ले पालन ठउका करे जाही। प्रस्तावित नियम मन म रेत खदान आवंटन के कार्यवाही इलेक्ट्रॉनिक नीलामी के माध्यम ले करे जाही। एखर से राजस्व म घलोक बढ़ोतरी होही।
3) कृषि जमीन के बाजार मूल्य दर के निर्धारण के संबंध म छत्तीसगढ़ शासन के वाणिज्य कर पंजीयन विभाग ले मिले प्रस्ताव के मंत्रिपरिषद ह अनुमोदन करिस, जेखर तहत ग्रामीण कृषि जमीन के बाजार मूल्य के गणना बर 500 वर्गमीटर तक के भू-खण्ड के दर ल खतम करत सम्पूर्ण रकबा के गणना हेक्टेयर दर ले करे जाही। भारतमाला परियोजना अऊ बिलासपुर के अरपा भैंसाझार म जेन प्रकार के अनियमितता आगू आए रहिस, वोखर से बचे बर ये व्यवस्था मददगार होही। अइसनहे ग्रामीण क्षेत्र के बदला जमीन के मूल्यांकन सिंचित जमीन के ढाई गुना करे के प्रावधान ल विलोपित करे के संग ही शहरी सीमा ले लगे गांव मन के भूमि अऊ निवेश क्षेत्र के भूमि मन बर वर्गमीटर म दर के निर्धारण करे जाही।
4) मंत्रिपरिषद् के बैठक म छत्तीसगढ़ स्टेट क्रिकेट संघ (cscs) ल नवा रायपुर (अटल नगर) के सेक्टर-3, ग्राम परसदा म क्रिकेट अकादमी के स्थापना के बर 7.96 एकड़ जमीन आबंटित करे के प्रस्ताव ल स्वीकृति देहे गीस।
नवा रायपुर म अत्याधुनिक क्रिकेट अकादमी के स्थापना ले राज्य के प्रतिभावान खिलाड़ी मन ल ऊंखर कौशल अऊ प्रतिभा ल निखारे के बर अंतरराष्ट्रीय स्तर के सुविधा मिलही।
छत्तीसगढ़ राज्य म क्रिकेट के क्षेत्र म अपार संभावना हे। राज्य के कई युवा खिलाड़ी मन ह राष्ट्रीय-अंतरराष्ट्रीय स्तर म सफलता अर्जित करे हें। क्रिकेट अकादमी के स्थापना ले राज्य के खिलाड़ी मन ल क्रिकेट के क्षेत्र म आगू बढ़े के मौका मिलही उहें छत्तीसगढ़ ल राष्ट्रीय अऊ अंतरराष्ट्रीय स्तर म विशेष पहिचान मिलही।