- जिला के हालत ल देखत कलेक्टर मन लेही निर्णय
- खरीफ फसल के सिंचाई बर 28 जुलाई ले जलाशय मन ले छोड़े जाही पानी
रायपुर, 27 जुलाई 2020। छत्तीसगढ़ म कोरोना संक्रमण के रोकथाम अऊ बचाव बर हॉटस्पॉट क्षेत्र मन म लॉकडाउन के बेरा ल अब 6 अगस्त तक बढ़ाए के निर्णय लेहे गए हे। जिला मन म कोरोना संक्रमण वाले इलाका मन के स्थिति ल ध्यान म रखत कलेक्टर स्थानीय स्तर म लॉकडाउन के संबंध म निर्णय लेंहीं। मुख्यमंत्री श्री भूपेश बघेल के अध्यक्षता म ऊंखर निवास कार्यालय म उच्च् स्तरीय बैठक म राज्य म कोरोना संक्रमण के स्थिति उपर गहन विचार विमर्श के बाद ये निर्णय ले गीस। ये बेरा म मंत्रिपरिषद के सदस्यगण उपस्थित रहिन।
बैठक म लेहे गए निर्णय मन के जानकारी देवत कृषि अउ जल संसाधन मंत्री श्री रविन्द्र चौबे ह बताइस के रायपुर, दुर्ग अऊ बिलासपुर जइसे बड़का शहर मन म जिहां कारोना संक्रमण तेजी ले फैलत हे, ओखर रोकथाम ल धियान म रखत राज्य शासन ह लॉकडाउन के अवधि ल 28 जुलाई ले बढ़ाके 6 अगस्त तक करे के निर्णय लेहे हे। जऊन इलाका मन म संक्रमण के स्थिति जादा हे उहां लॉकडाउन के कायदा कानून के कड़ाई ले पालन सुनिश्चित करे के निर्देश दे गए हे।
उच्च स्तरीय बैठक म स्वास्थ्य विभाग के वरिष्ठ अधिकारी मन ल राज्य म कोरोना संक्रमण के रोकथाम अऊ उपचार बर स्वास्थ्य सेवा ल अऊ जादा प्रभावी बनाए के संग अस्पताल मन म कोविड-19 के इलाज बर बेड के संख्या बढ़ाए, लैब तकनीशियन, एएनएम अउ स्वास्थ्य कार्यकर्ता मन के पूर्ति जिला खनिज निधि न्यास मद ले करे के निर्देश जिला कलेक्टर मन ल देहे गए हे।
उच्च स्तरीय बैठक म राज्य म खरीफ फसल मन के स्थिति उपर घलोक विस्तार ले चर्चा करे गीस। खरीफ फसल मन के सिंचाई बर जरूरत अऊ जलाशय मन म पानी उपलब्धता ल देखत 28 जुलाई ले जलाशय मन ले पानी छोड़े के घलोक निर्णय ले गीस। बैठक म निगम, मंडल, आयोग, प्राधिकरण के बांचे खाली पद म नियुक्ति के संबंध म घलोक विस्तार ले चर्चा करे गीस।