जांजगीर-चांपा, मुख्यमंत्री श्री भूपेश बघेल ह सक्ती के कार्यक्रम म कहिन कि पाछू करीब साढ़े 3 साल म छत्तीसगढ़ के समन्वित विकास के काम होए हे। उमन कहिन कि ये बेरा म राज्य के किसान, महिला, गांव वाले, भूमिहीन खेतिहर मजदूर, बेरोजगार मन के कल्याण के संगें-संग प्रशासनिक कसावट के क्षेत्र म घलोक शासन कोति ले महत्वपूर्ण काम करे गीस।
मुख्यमंत्री श्री बघेल आज नगर पालिका सक्ती के बुधवारी बाजार स्थित दीनदयाल स्टेडियम म पूर्व मंत्री अऊ छत्तीसगढ़ के स्वप्न दृष्टा स्वर्गीय श्री बिसाहू दास महंत के प्रतिमा के अनावरण अऊ विकास काम मन के लोकार्पण अऊ शिलान्यास समारोह ल संबोधित करत रहिन। मुख्यमंत्री श्री बघेल ह आज सक्ती म बहुत अकन महत्वपूर्ण घोषणा घलोक करिन। एमां सक्ती म शासकीय महाविद्यालय के घोषणा संग सतनामी समाज के सामुदायिक भवन निर्माण बर 20 लाख रुपए के घोषणा हे। उहें विधायक श्री राम कुमार यादव के मांग म नगर पंचायत चंद्रपुर म गौरवपथ, सहकारी बैंक, प्राथमिक स्वास्थ्य केंद्र अऊ पुलिस चौकी के घोषणा करिन। ये बेरा म विधानसभा अध्यक्ष डॉ चरणदास महंत, सांसद श्रीमती ज्योत्सना महंत, विधायक श्री राम कुमार यादव संग आन जनप्रतिनिधि, प्रशासनिक अधिकारी उपस्थित रहिन।
छत्तीसगढ़ के सरलग होवत हे समकुल विकास : मुख्यमंत्री
