हर महिना 20 ले 25 हजार के आमदनी होवत हे
ब्यूटी पार्लर, रेडीमेड कपड़ा अऊ केक के व्यवसाय ले मिलिस सफलता
कोरिया, जिला के शांत घाटी ले एक प्रेरणादायक सफलता के कहानी आगू आय हे। सोनहत जनपद के कटगोड़ी गांव के निवासी श्रीमती दीपा साहू आज ओ महिला मन बर एक मिसाल बन गे हें, जेन आत्मनिर्भरता के दिशा म आघू बढ़े के उदीम करत हें। एक समय रहिस जब दीपा केवल घरेलू काम तक ही सीमित रहिस, लेकिन राष्ट्रीय ग्रामीण आजीविका मिशन ‘बिहान’ ले जुड़े के बाद ओखर जीवन पूरा बदल गे।
दीपा साहू ल ‘अनादी महिला स्वयं सहायता समूह’ के सदस्य बने के संगे-संग समूह के अध्यक्ष बने के अवसर मिलिस अऊ इहीं ले ओखर आत्मनिर्भर बने के यात्रा शुरू होईस। जानबा हे के बिहान योजना के मुख्य लक्ष्य ग्रामीण क्षेत्र मन म महिला मन ल सशक्त बनाना अऊ गरीबी ल कम करना हे। ए योजना स्व-सहायता समूह मन ल वित्तीय सहायता, प्रशिक्षण अऊ आन जरूरी सहायता प्रदान करके हासिल करे जाथे।
प्रशिक्षण ले शुरू होइस नवा यात्रा
दीपा ह पहिली ब्यूटीशियन के प्रशिक्षण प्राप्त करिस अऊ अपन घर म ही एक छोट कन पार्लर के शुरुआत करिस। एखर बाद ओहा सामुदायिक निवेश निधि (सीआईएफ) ले 60 हजार रूपिया अऊ बैंक लिंकेज ले 1.20 लाख रूपिया के ऋण प्राप्त करके न केवल पार्लर के विस्तार करिस, बल्कि रेडीमेड कपड़ा मन के दुकान घलो खोलिस। सेंगेच केक बनाए के प्रशिक्षण लेके ए हुनर ल घलो व्यवसाय म शामिल कर लिस। आज दीपा के पास तीन सफल व्यवसाय हे। पार्लर, कपड़ा के दुकान अऊ केक बनाए के व्यवसाय। लगन, मेहनत, ईमानदारी के संग-संग बचत के आदत ले ओहा अपन पहचान एक सफल महिला उद्यमी के रूप म बनाए हवय।
दीपा साहू के कहना हे के हर महिला म कोई न कोई हुनर जरूर होथे, बस ओला चिन्हे अउ निखारे के जरूरत होथे। जब महिला मन अपन पांव म खड़ा होहीं, तभे परिवार अउ समाज मजबूत होही। उमन सरकार द्वारा चलाए जात गरीबी उन्मूलन अउ महिला सशक्तिकरण जन हितकारी योजना के सराहना करिन।
ये सीआईएफ काये
बिहान योजना के तहत, स्व सहायता समूहमन ल सामुदायिक निवेश निधि (सीआईएफ) प्रदान करे जाथे। ए निधि समूहमन ल आजीविका गतिविधिमन ल विकसित करे अउ सामाजिक आवश्यकता ल पूरा करे म मदद करथे। सीआईएफ नंबर एक अद्वितीय पहचानकर्ता हवय, जेहर बैंक खाता अउ लेनदेन ले संबंधित जानकारी ल सुरक्षित रखे म मदद करथे। ए खाताधारमन ल कई बैंकिंग सेवा जइसे ऋण, खाता अपडेट अउ आने वित्तीय लेनदेन ल आसानी ले प्राप्त करे म मदद करत हवय।
