मुख्यमंत्री श्री विष्णु देव साय ले बुनकर समाज के प्रतिनिधिमंडल ह करिस सौजन्य भेंट

राष्ट्रीय हथकरघा दिवस म मुख्यमंत्री ल करघा भेंटकरके करिन अभिनंदन
प्रदेश म बुनकर मन के सम्मान, समृद्धि अऊ सशक्तिकरण बर करे जात हे विशेष प्रयास – मुख्यमंत्री
रायपुर, राष्ट्रीय हथकरघा दिवस के अवसर म छत्तीसगढ़ बुनकर समाज के प्रतिनिधिमंडल ह राजधानी रायपुर स्थित मुख्यमंत्री निवास कार्यालय म मुख्यमंत्री श्री विष्णु देव साय ले सौजन्य भेंट करिस।
मुख्यमंत्री श्री साय ह सबो प्रतिनिधि मन के आत्मीय स्वागत करत ओ मन ल राष्ट्रीय हथकरघा दिवस के हार्दिक शुभकामना दीन। मुख्यमंत्री ह बुनकर समाज के सराहना करत कहिन के हथकरघा कला हमर समृद्ध विरासत हे, जेन प्रदेश ल एक विशिष्ट पहचान देवाथे अऊ हमर सांस्कृतिक अस्मिता ल सशक्त बनाथे। मुख्यमंत्री ह कहिन के छत्तीसगढ़ के बुनकर समाज अपन श्रम, कौशल अऊ रचनात्मकता के माध्यम ले राज्य के गौरव बढ़ावत हे।
मुख्यमंत्री श्री साय ह कहिन के राज्य सरकार बनुकर मन के समृद्धि, सशक्तिकरण अऊ आत्मनिर्भरता बर बहुआयामी प्रयास करत हे। कच्चा माल सुलभ कराए ले लेके लागत कम करे अऊ विपणन के बेहतर सुविधा देवाए तक के, हर मोरचा म योजना मन के प्रभावी क्रियान्वयन करे जात हे। उमन कहिन के बुनकर मन के आत्मनिर्भरता ही उंखर रचनात्मक उड़ान ल नवा ऊँचाई दे सकत हे।
प्रधानमंत्री श्री नरेंद्र मोदी कोति ले देहे गे “वोकल फॉर लोकल” के मंत्र के उल्लेख करत मुख्यमंत्री ह कहिन के ये समय हमार पारंपरिक उत्पाद अऊ हुनर ल प्रोत्साहन देहे के हे। हथकरघा उद्योग केवल आजीविका के माध्यम नइ हे, बल्कि सांस्कृतिक चेतना के जीवंत चिनहारी हे, जेन ल बुनकर समाज आज घलोक सहेजे हें।
एखर अवसर म समाज के सदस्य मन ह मुख्यमंत्री ल बुनकर मन कोति ले करघा (कपड़ा बुने के पारंपरिक मशीन) के प्रतिकृति भेंट करिन। मुख्यमंत्री ह कहिन के आप मन के ये भेंट न केवल आप मन के सम्मान अऊ भावना के चिनहारी हे, बल्कि सृजन, परंपरा अऊ हमार प्रदेश के सांस्कृतिक मूल्य मन के घलोक चिनहारी हे।