छत्तीसगढ़ के हर्बल गुलाल के यूरोप म मांग

रायपुर, मुख्यमंत्री श्री भूपेश बघेल आज रायपुर स्थित अपन निवास कार्यालय म आयोजित कार्यक्रम म छत्तीसगढ़ राज्य म तियार हर्बल गुलाल ले भरे ट्रक ल यूरोप एक्सपोर्ट करे बर झंडी देखाके रवाना करिन। ये हर्बल गुलाल स्व-सहायता समूह के सखी क्लस्टर संगठन अंजोरा राजनांदगांव अउ कुमकुम महिला ग्राम संगठन सांकरा दुर्ग के महिला मन ह श्री गणेशा ग्लोबल गुलाल प्राइवेट लिमिटेड के मार्गदर्शन म अपन लगन अऊ मेहनत ले तियार करे हें। यूरोप एक्सपोर्ट होत 23 हजार 279 किलो हर्बल गुलाल के कीमत 41 लाख 95 हजार 302 रूपिया हे। छत्तीसगढ़ के हर्बल गुलाल ले भरे ट्रक ल यूरोप रवाना करे खातिर झंडी देखाय के मौका म मुख्यमंत्री के सलाहकार श्री प्रदीप शर्मा, विधायक अऊ छत्तीसगढ़ गृह निर्माण मंडल के अध्यक्ष श्री कुलदीप जुनेजा अउ नगर निगम रायपुर के महापौर श्री एजाज ढेबर, श्री गणेशा ग्लोबल गुलाल प्राइवेट लिमिटेड के डायरेक्टर श्री अनुज गोयल अउ महिला स्व-सहायता समूह के पदाधिकारीगण मौजूद रहिन।
जानबा हे कि मुख्यमंत्री श्री भूपेश बघेल के मंशा के मुताबिक महिला समूह मन ल आर्थिक रूप ले आत्मनिर्भर बनाए बर गौठान मन म कई प्रकार के आयमूलक गतिविधि संचालित करे जात हे। गौठान मन के सामुदायिक बाड़ी मन म फूल के खेती विशेषकर गेंदा फूल के खेती शुरू करे गए हे ताकि एखर से महिला समूह मन ल अऊ जादा आय हासिल हो सकय। फूल ले हर्बल गुलाल के निर्माण बर 18 फरवरी 2022 के मुख्यमंत्री श्री भूपेश बघेल के मौजूदगी म श्री गणेशा ग्लोबल गुलाल प्राइवेट लिमिटेड अऊ छत्तीसगढ़ शासन के उद्यानिकी अउ प्रक्षेत्र वानिकी के संचालक के बीच एमओयू होए रहिस। एखर पहिली चरण म 150 महिला स्व-सहायता समूह मन के माध्यम ले हर्बल गुलाल अउ हर्बल पूजन सामान तियार करे जात हे। महिला समूह मन कोति ले तियार 23 हजार 279 किलो हर्बल गुलाल ल श्री गणेशा ग्लोबल गुलाल प्राइवेट लिमिटेड के सहयोग ले यूरोप एक्सपोर्ट करे बर रायपुर ले गुजरात स्थित मुंदरा पोर्ट भेजे जाही। एक्सपोर्ट हर्बल गुलाल के पैकेजिंग अलग-अलग आकार अऊ वजन म करे गए हे। हर्बल गुलाल के कुल मूल्य 54 हजार 491 यू.एस. डॉलर मने भारतीय रूपिया म एखर कीमत 41 लाख 95 हजार 302 रूपिया हे। गौठान के महिला समूह मन के मेहनत ले तियार हर्बल सामान के विदेश म एक्सपोर्ट होना छत्तीसगढ़ राज्य अऊ स्व-सहायता समूह मन बर गौरव के बात हे।