रायपुर, 10 जनवरी 2024। रायपुर, 10 जनवरी 2024। मुख्यमंत्री श्री विष्णु देव साय लोकतंत्र सेनानी संघ के प्रांतीय परिवार सम्मेलन अऊ सम्मान समारोह म सामिल होइन। मुख्यमंत्री ह भारत माता के तैलचित्र म दीप प्रज्ज्वलित करके कार्यक्रम के शुभारंभ करिन। कार्यक्रम म राज्यसभा सांसद श्री कैलाश सोनी घलोक मौजूद रहिन। कार्यक्रम म मुख्यमंत्री ह कहिन के मीसा बंदी मन ल सम्मान राशि के बहाली बर छत्तीसगढ़ सरकार पहल करही। कार्यक्रम म मीसाबंदी मन के आपबीती सुनके भावुक होइन मुख्यमंत्री अउ कहिन मोर बड़े पिता जी घलोक 19 महीना मीसाबंदी रहिन, मैं ये पीड़ा ल जानथों।
उमन कहिन के मैं ह मीसा बंदी मन के तकलीफ ल बहुत करीब ले देखे हंव। ऊंखर संघर्ष अऊ पीड़ा ल मैं ह महसूस करे हंव। आपातकाल के समय मोर बड़े पिताजी स्वर्गीय श्री नरहरि साय घलोक 19 महीना तक जेल म रहिन। ये बात मुख्यमंत्री श्री विष्णु देव साय ह आज राजधानी रायपुर के वृंदावनहाल म लोकतंत्र सेनानी संघ कोति ले आयोजित प्रांतीय परिवार सम्मेलन अऊ सम्मान समारोह म कहीन। मुख्यमंत्री ह कहिन कि सरकार मीसाबंदी मन के सम्मान राशि के बहाली बर पहल करही। सम्मेलन म प्रदेश भर ले आए मीसा बंदी अऊ ऊंखर परिजन ह अपन आपबीती घलोक साझा करिन। मुख्यमंत्री श्री विष्णु देव साय ह आपातकाल के समय के जिक्र करत कहिन कि लोकतंत्र सेनानी जब जेल जात रहिन तो ओ परिवार के स्थिति बड़ पीड़ादायक हो जात रहिस। ए परिवार के आगू आजीविका के संकट हो जात रहिस। मीसा बंदी मन के संग हमर सरकार न्याय करही। पूर्ववर्ती डॉ रमन सिंह के सरकार ह मीसाबंदी मन बर सम्मान राशि देहे के शुरुआत करे रहिन। हम मीसाबंदी मन बर बेहतर काम करबो।
राज्यसभा सांसद अऊ लोकतंत्र सेनानी संघ के राष्ट्रीय अध्यक्ष श्री कैलाश सोनी ह कहिस कि लोकतंत्र बर संघर्ष के बात जब भी आही, तब ए लोकतंत्र के प्रहरी मीसा बंदी मन के संघर्ष ले प्रेरणा लेहे जाही। इमन लोकशाही बर लड़ाई लड़े रहिन। ये भारत के इतिहास म एक बड़का उदाहरण हे।
कार्यक्रम ल विधायक श्री पुरंदर मिश्रा, लोकतंत्र सेनानी संघ के राष्ट्रीय उपाध्यक्ष श्री सच्चिदानंद उपासने ह घलोक संबोधित करिन।
कार्यक्रम म श्री रामप्रताप सिंह, लोकतंत्र सेनानी संघ के राष्ट्रीय कोषाध्यक्ष श्री संतोष शर्मा, नव नियुक्त प्रदेश अध्यक्ष श्री दिवाकर तिवारी, पूर्व प्रदेश अध्यक्ष श्री द्वारिका जायसवाल संग आन गणमान्य नागरिक उपस्थित रहिन।
