वनांचल क्षेत्र ग्राम बोक्करखार म 120 गांव वाले मन के करे गीस जांच
कवर्धा, 29 जुलाई 2024, उपमुख्यमंत्री श्री विजय शर्मा के निर्देश म सुदूर वनांचल क्षेत्र मे लगातार स्वास्थ्य शिविर के आयोजन करे जात हे। अब तक बोड़ला ब्लॉक के तरेगांव जंगल, रेंगाखार, झलमला, चिल्फी संग 27 जुलाई ल वनांचल क्षेत्र ग्राम बोक्करखार म स्वास्थ शिविर के आयोजन करे गए हे। स्वास्थ्य शिविर म 120 मनखे मन के जांच अऊ उपचार करे गीस।
मुख्य चिकित्सा अउ स्वास्थ्य अधिकारी डॉ. बीएल राज ह बताइस कि स्वास्थ शिविर 30 मनखे मन के बीपी अऊ शुगर , 67 लोगो के मलेरिया के जांच करे गीस, जेमां सबो के रिपोट नेगेटिव पाए गीस। 10 झन के सिकल जांच करे गीस जेमां 9 नेगेटिव अऊ 1 पॉजिटिव मिलीस। 40 लइका मन के स्वास्थ्य जांच करे गीस, जेमां 1 लइका ल एनआरसी जिला अस्पताल बर चिन्हांकित करे गीस। 30 महिला मन के जांच करे गीस जेमां ले 1 महिला ल जिला अस्पताल सर्जरी बर चिन्हांकित करे गीस।
शिविर म मौसमी बीमारी के बचाव के बारे म घलोक जानकारी देहे गीस। ए बेरा म सबो ल स्वच्छता विधि के बारे म बताए गीस। बार-बार हाथ धोए साफ सफाई ताजा भोजन खाए अऊ पानी ल उबाल के अऊ साफ पानी पीए बर जागरूक करे गीस। दस्त अऊ उल्टी होए म ओआरएस अऊ जिंक के सेवन अऊ नजदीक अस्पताल मे तुरंत ले जाय बर मनखे मन ल बताए गीस। शिविर म सर्प दंश के बचाव के बारे मे बताए गीस, सर्प दंश होए म तुरंत अस्पताल ले जाय के सलाह दे गीस। गांव वाले मन ल सर्प दशं के बाद झाड़ फूंक म नइ परे के सलाह दे गीस। शिविर के आयोजन सीएमएचओ डॉ. बी एल राज अऊ बीएमओ बोड़ला के मार्गदर्शन म करे गीस। शिविर मे स्त्री रोग विशेषज्ञ डॉ. जितेंद्र वर्मा, डॉ. योगेश साहू, एडी मानिकपुरी नॉन मेडिकल असिस्टेंट श्री दिनेश तिवारी, मेडिकल असिस्टेंट श्री प्रकाश गुप्ता फार्मिसिट्स, सीएचओ सावित्री परते, एमएलटी श्री जलेश्वर पटेल, लिलेश सतपथी संग ग्रामीण स्वास्थ सयोजक, मितानिन अउ आंगन बाड़ी कार्यकर्ता ह सेवा दीन। शिविर म संदीप मानिकपुरी बीईटीओ अऊ गांव के श्री प्रेमलाल नायक के विशेष सहयोग रहिस।
