उपमुख्यमंत्री श्री विजय शर्मा ह 18 करोड़ रुपिया के लागत ले दु ठन मुख्य सड़क निर्माण काम के करिन भूमिपूजन
ग्रामीण अंचल मन ल शिक्षा, स्वास्थ्य अउ आए-जाए के मिलही बने सुविधा
कबीरधाम, प्रदेश के उपमुख्यमंत्री अउ कवर्धा विधायक श्री विजय शर्मा ह क्षेत्र के पूरा विकास बर एक ठन बड़का पहल करत प्रधानमंत्री ग्राम सड़क योजना के तहत लगभग 18 करोड़ रुपिया के लागत ले मंजूर दू ठन महत्वपूर्ण सड़क निर्माण काम के विधि-विधान ले पूजा-पाठ करके भूमिपूजन करिन। भूमिपूजन कार्यक्रम के बाद सड़क बनाय के काम तुरंते शुरू कर देहे गए हे। उपमुख्यमंत्री श्री शर्मा ह कहिन के मजबूत सड़क नेटवर्क कोनो भी क्षेत्र के आर्थिक, सामाजिक अउ शैक्षणिक विकास के नेंव होथे। विष्णुदेव साय सरकार के लक्ष्य हे के आखिरी छोर म बसे गांव तक घलो मजबूत अउ सुरक्षित सड़क संपर्क मिलय, जेखर से गांव वाला मन ल मूलभूत सुविधा आसानी ले मिल सकय। भूमिपूजन करे गे सड़क निर्माण काम मन म मेन रोड ले लासाटोला तक 9.89 करोड़ रुपिया के लागत वाला 15.20 किलोमीटर लंबा सड़क अउ एन.एच.-12ए ले भेदली तक 8.13 करोड़ रुपिया लागत के 12.91 किमी लंबा सड़क के निर्माण शामिल हे।
उपमुख्यमंत्री श्री विजय शर्मा ह क्षेत्रवासी मन ल संबोधित करत कहिन के ये सड़क मन के बने ले लासाटोला, बदराडीह, बम्हनी, महारटोला, नवागांव, नेवासपुर सहित आस-पास के कतको गांव ल सीधा लाभ मिलही। संग म मेन रोड ले भेदली जुड़ जाए से भीमपुरी, झिरोनी, जिंदा, खैरझीटी खुर्द, कुटकी पारा, सोनपुरी अउ थूहा डीह के ग्रामीण मन ल घलो बने सड़क सुविधा मिलही। उमन कहिन के सरकार के साफ अउ पक्का लक्ष्य हे के विकास के अंजोर आखिरी छोर म बसे गांव तक पहुंचय। एकर बर मजबूत, सुरक्षित अउ बारो मासी (सबो मौसम बर) सड़क संपर्क ल प्राथमिकता के साथ विकसित करे जात हे।
उपमुख्यमंत्री श्री विजय शर्मा ह कहिन के ये क्षेत्र मन म सड़क बन जाए ले ग्रामीण मन ल आए-जाए म सुविधा होही, किसान मन ल अपन उपज मंडी तक पहुंचाए म आसानी होही अउ व्यापार-रोजगार के नवा मौका बनही। विद्यार्थी मन ल स्कूल-कॉलेज जाए म सहुलियत मिलही अउ गंभीर मरीज मन ल समय पे अस्पताल पहुंचाना संभव हो सकही।
उमन ये घलो कहिन के प्रदेश सरकार ग्रामीण अधोसंरचना विकास ल सबले ऊपर प्राथमिकता देवत हे। सड़क, पुल, बिजली, पिये के पानी, स्वास्थ्य अउ शिक्षा के क्षेत्र म सरलग काम करे जात हे। सरकार के संकल्प हे के हर गांव ल मुख्य रद्दा ले जोड़के विकास के मुख्यधारा म शामिल करे जाए।
उपमुख्यमंत्री श्री विजय शर्मा ह निर्माण एजेंसी मन ल निर्देश दीन के सड़क निर्माण काम गुणवत्तापूर्ण, समय सीमा म अउ पारदर्शी तरीका ले पूरा करे जाए, ताकि आम जनता ल लंबा समय तक एकर लाभ मिल सकय। भूमिपूजन कार्यक्रम के बेरा क्षेत्र के जनप्रतिनिधि, बड़े अधिकारी मन, पंचायत प्रतिनिधि अउ भारी संख्या म ग्रामीणजन उपस्थित रिहिन। सबो झन सड़क निर्माण काम शुरू होय ले खुसी जताइन अउ शासन के प्रति आभार मानिन।