बस्तर म अब बंदूक नही, विकास अउ आत्मनिर्भरता के गोठ
बीजापुर के युवा मन ल मिलिस स्वावलंबन के नवा रद्दा
बीजापुर, बस्तर के हवा म अब बारूद के गंध नहीं, बल्कि विकास अउ आत्मनिर्भरता के खुशबू महकत हे। हिंसा के रद्दा ल छोड़ के समाज के मुख्यधारा म लहुटे युवा मन बर आज के दिन एक नवा सुरुज लेके आइस, जब प्रदेश के उप मुख्यमत्री श्री विजय शर्मा ह ओमन ल खुद के गोड़ म खड़ा होय के रद्दा देखाइन। ‘फूड एंड बेवरेज’ के खास ट्रेनिंग पाय बीजापुर जिला के 30 पुनर्वासित युवा मन ल आज जिनगी के नवा शुरुआत बर जरूरी समान मिलिस।
ए सुग्घर कार्यक्रम म उप मुख्यमत्री श्री विजय शर्मा ह ट्रेनिंग पूरा करइया युवा मन ल ‘पासिंग आउट सर्टिफिकेट’ दीन। संग म ओमन ल खुद के काम-काज शुरू करे बर टूलकिट अउ मेल-जोल बर मोबाइल फोन घलो बांटिन। उप मुख्यमत्री ह ए युवा मन के मुख्यधारा म लहुटे के हिम्मत के सराहना करिन अउ उमन के बने भविष्य के आस जगावत कहिन के अब ए युवा मन समाज बनाय म अपन बने भूमिका निभाही।
उप मुख्यमत्री श्री शर्मा ह युवा मन ले गोठ-बात करके ट्रेनिंग के जानकारी लीन अउ कहिन के बीजापुर जिला बहुत सुंदर हे। उमन बताइन के सरकार ह ‘होम स्टे’ योजना शुरू करे हे, जेकर तहत कोनो घलो परिवार खेती-किसानी के संग अपन घर म एक कमरा बना के होम स्टे चला सकत हे। तुमन ल होटल मैनेजमेंट के ट्रेनिंग मिले हे, जेकर ले तुमन होम स्टे के काम ल अउ बने ढंग ले कर सकत हौ। ओमन सबो झन ल सुभकामना देवत कहिन के अपन गांव जाके बने सहिन जिनगी गुजारव अउ अइसन युवा मन जेन भटक गे हें, ओमन ल घलो समझावव। ए मउका म वन मत्री श्री केदार कश्यप ह घलो नवा जिनगी बर बधाई दीन।
जानबा हे के बस्तर जिला म अब तक कुल 343 पुनर्वासित युवा मन ल राजमिस्त्री, बकरी पालन, मुर्गी पालन अउ हॉस्पिटैलिटी जइसे अलग-अलग काम के ट्रेनिंग देहे गए हे। एमां ले 161 युवा मन ल ‘नुवा बाट’ आवासीय प्रशिक्षण केंद्र म निखारे गे हे। कौशल विकास के ए काम सरलग चलत हे, अउ अभी 28 युवा मन उंहे वेल्डिंग के ट्रेनिंग लेवत हें। ए कोसिस ह प्रधानमत्री श्री नरेन्द्र मोदी अउ केंद्रीय गृह मत्री श्री अमित शाह के 31 मार्च 2026 तक नक्सलवाद ल जड़ ले खतम करे के संकल्प ल पूरा करे म बड़े भूमिका निभाही।
ए मउका म विधायक श्री किरण सिंह देव, बस्तर कमिश्नर श्री डोमन सिंह, आईजी श्री सुन्दरराज पी, जिला पंचायत सीईओ श्री चिनहा जैन संग अउ कइ अधिकारी अउ जनप्रतिनिधि मन उपस्थित रहिन।