- कम खरचा म कार अऊ सुपर बाइक जइसे मिलही सुविधा
- पर्यावरण संरक्षण के दिशा म हे उपयोगी
रायपुर, आप मन ल ये जान के बड़ खुसी होही के कक्षा बारहवी के छात्र देव पण्डया कोति ले सोलर ले चलइया अइसे सुपर स्मार्ट साइकिल तियार करे हे जे ह सुविधा अऊ सुरक्षा के मामला म महंगी बाइक अऊ कार मन ल पीछू छोड़ देहे हे। येकर खास बात ये हे कि ये सोलर साइकिल ल बनाए म सिरिफ दस हजार रूपिया के लागत आए हे, उहें ये तेल ले चलइया अऊ प्रदूषण फइलइया मोटर साइकिल मन के तुलना म ईको फ्रेण्डली घलो हे। अभी हाल समय म जब पर्यावरण संरक्षण ल लेके लगातार उपाय करे जात हे अइसन म छात्र देव पंडया कोति ले तियार सोलर साइकिल भविष्य म ये तरफ कदम बढ़ाए अऊ अइसन तकनीक मन के उपयोग करे के प्रेरणा देथे।
रायपुर के गुजराती उच्चतर माध्यमिक विद्यालय के अंगरेजी माध्यम म कक्षा बारहवी के पढ़ाई करइया गणित के छात्र देव पंडया ह अपन बहुमुखी प्रतिभा अऊ कौशल ले सोलर सिसटम ले चलइया स्मार्ट साइकिल तियार करे हे। ये साइकिल के बारे म देव ह बताइस कि सोलर साइकिल ल बनाए म सिरिफ सात हजार रूपिया के खरचा आए हे। ये मां 15 आधुनिक सुविधा हे। ये मां साइकिल चलात गर्मी ले बांचे बर पंखा, सुरक्षा अऊ दुर्घटना के समय के फुटेज बर कैमरा, मोबाइल चार्ज करे बर चार्जर पाइंट, बाइक अऊ कार के जइसे लॉक होवइया सेंट्रल लॉकिंग सिसटम चाबी, डेरी-जेउनी मुड़े बर इण्डीकेटर, म्यूजिक सिसटम, हॉर्न, चोरी ले बचाय बर सिक्यूरिटी अलर्ट, ब्रेक लगाय के समय साइकिल उहें रूक जाय ते खातिर इलेक्ट्रॉनिक ब्रेकिंग सिसटम आदि लगाए हे।
पांच रूपिया म तीस किलोमीटर के दूरी तय कर सकत हे
देव ह बताइस कि 4 ले 5 घंटा चार्ज करे म ये साइकिल 30 किलोमीटर तक चल जाथे। ये मां 12 वोल्ट के एक बैटरी, 12 वोल्ट के सोलर प्लेट लगाए गए हे। अभी हाल म जहां पेट्रोल अऊ डीजल के कीमत जादा होए के संग वाहन मन म माइलेज के समस्या हे अइसन म ये सोलर साइकिल म पांच रूपिया के लागत म 30 किलोमीटर के दूरी तय करथे ये बने बात हे।
