कुटुंब अऊ समाज के उत्थान बर शिक्षा जीवन के अभिन्न हिस्सा: डॉ. डहरिया
रायपुर, नगरीय प्रशासन मंत्री डॉ. शिवकुमार डहरिया ह काली आरंग विकासखंड अंतर्गत ग्राम देवरतिल्दा म हाई स्कूल भवन निर्माण बर भूमिपूजन करिन। एखर लागत 75 लाख रूपिया हे। डॉ. डहरिया ह कार्यक्रम ल सम्बोधित करत कहिन कि अभी हाल परिवेश म शिक्षा जीवन के विकास अऊ प्रगति बर ताकतवर हथियार हे। कुटुंब अऊ समाज के उत्थान बर शिक्षा जीवन के अभिन्न हिस्सा हे। आज के लइका कल के भविष्य हे। प्रदेश के सबो वर्ग मन के संगें-संग लइका मन के भविष्य गढ़े के दिशा म राज्य सरकार काम करत हे। लइका मन के शिक्षा म सरकार के तरफ ले कोनो कमी नइ होए दन। आप मन सबला घलोक सरकार के विकास कार्य मन म सहभागी बने के जरूरत हे। डॉ. डहरिया ह बताइन कि राज्य सरकार समृद्ध गांव के परिकल्पना ल साकार करे बर छत्तीसगढ़ के संस्कृति के परम्परा मुताबिक नरवा, गरवा, घुरूवा अऊ बाड़ी योजना शुरू करे हे। प्रदेश म 10 हजार 971 ग्राम पंचायत अऊ करीबन 20 हजार गांव हे, केवल 9 महिना के कार्यकाल म सरकार करीबन 2000 गौठान स्वीकृत करके गौठान निर्माण के दिशा म काम करत हे। प्रदेश म आरंग विकासखंड म सबले जादा 52 गौठान स्वीकृत होए हे। आरंग विकासखंड के ही ग्राम बनचरौदा म बनाय गए आदर्श गौठान ल देखे बर राजस्थान के मुख्यमंत्री, मंत्री अऊ विधायक आए रहिन। आवइया समय म देश अऊ दुनिया के मनखे घलोक सरकार के ए योजना के अवलोकन अऊ अनुकरण करहीं।
कार्यक्रम म जनपद अध्यक्ष श्री दिनेश ठाकुर, सरपंच श्रीमती इन्द्ररानी धीवर संग सर्वश्री सुनील भतपहरी, भगवती धुरंधर, विष्णु धीवर, भूपेन्द्र साहू, रामशरण साहू, चन्द्रशेखर चंद्राकर, खिलेश्वर देवांगन, रेखराज पात्रे, प्रकाश साहू संग शिक्षक-शिक्षिका मन अऊ बड़ संख्या म ग्रामीण उपस्थित रहिन।
नंबर 2862
