दिव्यांगजन मन के हुनर ल निखार के स्वावलंबी बनाए बर जी परान देके करबो सहयोग: श्री भूपेश बघेल
मुख्यमंत्री ह शासकीय श्रवण बाधितार्थ बालिका विद्यालय अउ छात्रावास के नवा नवा बने भवन के करिन लोकार्पण
धमेन्द्र निर्मल के सार समाचार, प्रदेश के मुख्यमंत्री श्री भूपेश बधेल ह कहिन कि दिव्यांगजन मनं म कांही न कांही हुनर बजूर होथे। उन्कर ये हुनर ल निखारे के जरूरत परथे। राज्य सरकार डाहर ले एमा जी परान देके सहयोग दिए जाही तेकर ले उन मन हुनरमंद बनके आत्मनिर्भर हो सकै। उन मन आज जिला मुख्यालय धमतरी म शासकीय श्रवण बाधित बालिका विद्यालय, छात्रावास अउ प्रशिक्षण केन्द्र के नवा नवा बने भवन के लोकार्पण समारोह ल संबोधित करत रिहिन हे। ये अवसर म महिला अउ बाल विकास अउ समाज कल्याण मंत्री श्रीमती अनिला भेंड़िया तको संघरे रिहिन हे। मुख्यमंत्री ह विद्यालय अउ प्रशिक्षण केन्द्र म फर्नीचर, ओपन जिम, कम्प्यूटर, आडियोमैट्री रूम के संगे संग अउ आने व्यवस्था मन बर 2.62 करोड़ रूपिया के स्वीकृति तको प्रदान करिन।
मुख्यमंत्री ह कहिन कि नोनी मन ल पढ़ाई के संगे संग उन्कर भीतर छुपे प्रतिभा ल निखारे बर कम्प्यूटर, सिलाई, ब्यूटीपार्लर के संग अउ आने व्यवसायिक प्रशिक्षण प्रदान करे जावैं ताकि वो मन आगू चलके अपन पाँव म खड़ो हो सकै। उन मन कहिन कि एकर बर जउन भी बजट होही वोला राज्य सरकार डाहर ले दिये जाही। मुख्यमंत्री ह ये मौका म उपस्थित दिव्यंाग लइका अउ सियान मन ल सउँहत अपन हाथ ले भोजन परोसीन। उल्लेखनीय हावय कि राज्य सरकार के समाज कल्याण विभाग डाहर ले चलत शासकीय श्रवण बाधित बालिका विद्यालय, छात्रावास अउ प्रशिक्षण केन्द्र अभी किराया के भवन म चलत रिहिसे, एकर बर राज्य सरकार डाहर ले तीन करोड़ 30 लाख रूपए के लागत ले सर्वसुविधायुक्त ये भवन बनाए गे हावय। इहां गजब अकन जिला मन के 105 श्रवण बाधित नोनी अध्ययनरत हावयं। ये विद्यालय म कक्षा पहली ले दसवी तक के अध्ययन के बेवस्था हे।
मुख्यमंत्री ह ये अवसर म तृतीय लिंग समुदाय के रविशंकर नागार्ची ल प्रधानमंत्री आवास के कुची (चाबी) प्रदान करिन। संगे संग समाज कल्याण विभाग के
अबड़ अकन योजना मन के तहत तीन झन दिव्यांग दंपत्ति मन ल बिहाव प्रोत्साहन राशि, 50 झन मूक बधिर छात्रा मन ल अउ 10 झन सियानहा मन ल श्रवण यंत्र, 10 सियनहा मन ल वाकिंग स्टीक, दस झन दिव्यांगजन मन ल मोटराईज्ड ट्रायसायकल, दस झन दिव्यांगजन ल ट्रायसाइकल अउ व्हील चेयर बाँटिन। ये अवसर म दिव्यांग अउ वृद्धजन मन ल सम्मानित घलो करे गइन।
समाज कल्याण मंत्री श्रीमती अनिला भेंड़िया ह कहिन कि दिव्यांगजन मन कांही न कांही कला म माहिर होथे। ये विद्यालय अउ इहां के गुरूजी मन के मार्गदर्शन ले उन्कर कला ल निखारे म सहायता मिलही अउ ये लइका मन अवइया दिन म प्रदेश अउ देश के नाम रोशन करहीं। कार्यक्रम म सुराजी गांव योजना के तहत धमतरी गौठान-पशु मितान मोबाईल एप के शुभारंभ घलो करे गइस।
ये अवसर म पूर्व विधायक श्री लेखराम साहू, श्री राम गोपाल अग्रवाल, श्री गिरीश देवांगन, समाज कल्याण विभाग के संचालक श्री चंद्रकांत उइके, वरिष्ठ प्रशासनिक अधिकारी संग अबड़ झन गणमान्य नागरिक, दिव्यांग छात्रा मन अउ उन्कर पालक उपस्थित रिहिन हे।
चटकारा
सुखिया:- बहिनी आज मोला काम चलाए बर फोरन डारे के लइक गोंदली दे दे, तोर घर कभू कमी बेसी होही त ते माँग लेबे।
दुखिया:- जब के आमा तब के लबेदा दीदी, अभीन तोर तो काम चल जाय।
