विकसित छत्तीसगढ़ के सपना ल साकार करइया बजट: मुख्यमंत्री श्री विष्णु देव साय

रायपुर, 09 फरवरी 2024। मुख्यमंत्री श्री विष्णु देव साय ह कहिन हे कि छत्तीसगढ़ के वित्तीय साल 2024-25 के बजट अवइया कई बछर तक छत्तीसगढ़ के विकास के दिशा अऊ दशा संवारइया बजट ये। उमन कहिन कि ये बजट प्रदेश के राजस्व बढ़ाने वाला बजट हे। ए बजट म कर के कोनो नवा प्रस्ताव नइ हे, न ही अभी हाल के कर मन के दर म वृद्धि के कोनो प्रस्ताव हे। ये बजट सबो वर्ग के समावेशी विकास ल सुनिश्चित करइया अऊ विकसित छत्तीसगढ़ के सपना ल साकार करइया बजट हे। अमृतकाल के छत्तीसगढ़ प्रधानमंत्री श्री नरेन्द्र मोदी के साल 2047 तक विकसित भारत के निर्माण के लक्ष्य ल हासिल करे म अग्रणी भूमिका निभाही।
मुख्यमंत्री श्री साय आज वित्त मंत्री श्री ओ.पी. चौधरी के विधानसभा म वित्तीय साल 2024-25 के बजट प्रस्तुत करे के बाद समिति कक्ष म मीडिया प्रतिनिधि मन ल सम्बोधित करत रहिन। ए अवसर म उप मुख्यमंत्री श्री अरूण साव अऊ श्री विजय शर्मा, वित्त मंत्री श्री ओ.पी. चौधरी, मुख्य सचिव श्री अमिताभ जैन, मुख्यमंत्री के सचिव श्री पी. दयानंद अऊ वित्त सचिव श्री अंकित आनंद घलोक उपस्थित रहिन।
मुख्यमंत्री श्री साय ह कहिन कि बजट म हमर फोकस GYA यानि गरीब, युवा, अन्नदाता किसान अऊ नारी सशक्तिकरण उपर केन्द्रित हे। बजट म सबो वर्ग के चिन्ता करे गए हे। ये बजट हमर सरकार के विजन डॉक्युमेंट घलोक हे, जेन छत्तीसगढ़ के चौमुखी विकास के परिकल्पना ल दर्शाथे। उमन कहिन कि हमर प्रयास अवइया पांच बछर म राज्य के जीडीपी ल दोगुना करे के होही।