रोजगार के दिन अउ मजदूरी बाढ़े ले ग्रामीण परिवार मन ला मिलही आर्थिक मजबूती, गोमती साहू ह जताईस खुसी
मुंगेली, ग्रामीण परिवार मन ला जादा रोजगार, बने आय अउ आत्मनिर्भर जीवन के अधार देहे के उद्देस्य ले सुरू करे गे ‘विकसित भारत रोजगार एवं आजीविका गारंटी मिशन’ ह गांव मन म नवा उमीद जगाय हे। रोजगार के दिन ला बढ़ाके 125 दिन करे अउ मजदूरी दर म बढ़ोत्तरी ले गांव वाले मन म उछाह के माहौल हे। मुंगेली जिला के लिमहा गांव के रहइया श्रीमती गोमती साहू ह ए योजना ला ग्रामीण परिवार मन बर आर्थिक सुरक्षा अउ सम्मानजनक जीवन के रद्दा म एक बड़े कदम बतईस। ओहा कहिस के पहिली ग्रामीण परिवार मन ला बछर म सिरिफ 100 दिन के रोजगार मिलत रहिस, जेकर ले कइ पइत आर्थिक जरूरत मन ला पूरा करना कठिन हो जात रहिस। अब योजना के तहत 125 दिन के अकुशल श्रम आधारित रोजगार के गारंटी मिले ले परिवार के आय बाढ़ही अउ घर के खरचा मन के बेहतर बेवस्था हो सकही।
गोमती साहू ह कहिस के बाढ़े मजदूरी ले लइका मन के पढ़ई, परिवार के रोज के जरूरत अउ दूसर जरूरी खरचा मन ला पूरा करे म बड़ सुभीता होही। सब ले बड़े राहत ये हे के गांव म ही जादा दिन तक रोजगार मिले ले अब काम के खोज म बाहिर पलायन करे के जरूरत घलो कम होही। ए मिशन सिरिफ रोजगार देहे तक सीमित नो हे, बल्कि गांव मन के समग्र बिकास के मजबूत नेंव घलो रखही। योजना के तहत जल संरक्षण, प्राकृतिक संसाधन प्रबंधन, ग्रामीण अधोसंरचना निरमाण अउ आजीविका ले जुड़े परिसंपत्ति मन के बिकास ला पहिली प्राथमिकता देहे जाही, जेकर ले ग्रामीण अर्थव्यवस्था ला स्थायी मजबूती मिलही। गोमती साहू ह प्रधानमंत्री श्री नरेन्द्र मोदी अउ मुख्यमंत्री श्री विष्णुदेव साय के आभार जताइस अउ कहीस के सरकार के ए फैसला ह ग्रामीण परिवार मन के भबिस्य ला सुरक्षित अउ आत्मनिर्भर बनाये के रद्दा म एक बड़का उदिम आय। योजना ले रोजगार के अउ मउका मिलही, आय बाढ़ही अउ गांव के बिकास ला नवा गती मिलही।