कबीरधाम जिला म विकसित भारत संकल्प यात्रा म सामिल होइन उपमुख्यमंत्री श्री शर्मा

कबीरधाम, 11 जनवरी 2024। उपमुख्यमंत्री श्री विजय शर्मा आज कबीरधाम जिला के ग्राम पंचायत धरमपुरा अऊ बिरकोना म आयोजित विकसित भारत संकल्प यात्रा शिविर म सामिल होइन अऊ दीया बार के विधिवत शुभारंभ करिन। ये मौका म उमन गांव वाले मन ल 2047 तक आत्मनिर्भर अऊ विकसित राष्ट्र बनाए के किरिया घलोक खवाइन।
उपमुख्यमंत्री श्री शर्मा ह ये मौका म गांव वाले मन के मांग म कई ठन विकास कार्य के सौगात दीन। उमन ग्राम धरमपुरा म शिशु मंदिर भवन के बाउंड्रीवाल बर 2 लाख रूपिया, नट समाज के सामुदायिक भवन बर 4 लाख रुपिया, धान खरीदी स्थल म तार फेंसिंग बर 2 लाख रुपिया, सीसी सड़क बर 7 लाख रुपिया के घोषणा करिन। ओ मन ग्राम धरमपुरा म 2 गर्भवती माता मन के गोद भराई अऊ ग्राम बिरकोना म 4 शिशु मन के अन्नप्राशन कार्यक्रम म सामिल होइन।
उपमुख्यमंत्री श्री शर्मा ग्राम बिरकोना म आंगनबाड़ी भवन मरम्मत बर 1 लाख रुपिया, माध्यमिक स्कूल भवन के मरम्मत बर सबो जरूरी काम करे, ज्योति कलश निर्माण बर 10 लाख रुपिया के घोषणा करिन। उमन धरमपुरा म पटवारी भवन निर्माण बर प्रस्ताव अऊ प्राथमिक स्कूल म एक शिक्षक के व्यवस्था कराने के निर्देश दीन। विकासखण्ड शिक्षा अधिकारी ह बताइस कि दू दिन के भीतर धरमपुरा प्राथमिक स्कूल म शिक्षक के व्यवस्था हो जाही।
उपमुख्यमंत्री श्री विजय शर्मा ह केन्द्र सरकार कोति ले संचालित योजना मन अऊ विकसित भारत संकल्प यात्रा ले मनखे मन ल मिलइया लाभ के बारे म विस्तार ले बताइस। उमन स्वास्थ्य विभाग के स्टॉल, स्वास्थ्य परीक्षण, आयुष्मान भारत कार्ड निर्माण स्टॉल, दवाई वितरण स्टॉल, उज्जवला योजना स्टॉल, पशुधन, मत्स्य, उद्यानिकी, कृषि, राजस्व, शिक्षा, महिला अऊ बाल विकास विभाग मन के स्टॉल के अवलोकन करिन अऊ केन्द्रीय योजना मन के क्रियान्वयन, भौतिक लक्ष्य ल पूरा करे बर विभाग कोति ले करे जात प्रयास के विस्तार ले जानकारी लीन।
उपमुख्यमंत्री श्री शर्मा ह अवलोकन के समय सिकलसेल, मौसमी बिमारी मन के उपचार बर आए मरीज मन के संग आयुष्मान अऊ उज्जवला योजना के हितग्राही मन ले बातचीत करिन। ग्राम बिरकोना के 26 एकड़ तालाब म गांव के गन्दा पानी जाय ले रोके अऊ आन जरूरी सुधार बर मांग म उमन आगामी बजट म ये काम ल सामिल कराए अऊ स्कूल मैदान बर साफ-सफाई करे के आश्वासन दीन।