रायपुर, 21 जुलाई 2024। उप मुख्यमंत्री श्री अरुण साव ह आज गुरूपूर्णिमा म राजधानी रायपुर के बोरिया खुर्द म गजराज बांध Gajraj Dam in Boria Khurd म आयोजित वृहद वृक्षारोपण कार्यक्रम म पीपल के पौधा लगाइन। वृहद वृक्षारोपण कार्यक्रम के तहत 230 एकड़ म फइले गजराज बांध के चारों मुड़ा अलग-अलग चरण म 230 पौधा लगाए जाही। ए दूसर चरण म आज उप मुख्यमंत्री श्री अरुण साव के मुख्य आतिथ्य अऊ विधायक श्री मोती लाल साहू के अध्यक्षता म आयोजित कार्यक्रम म अतिथि मन अऊ बोरियावासी मन ह ‘पीपल फॉर पीपल’ अभियान के अंतर्गत 101 पौधा लगाइन। बोरिया खुर्द गजराज बांध संरक्षण समिति, शहर जिला साहू संघ, ग्रीन आर्मी ऑफ छत्तीसगढ़ अऊ भारतीय जैन संघटना कोति ले आयोजित कार्यक्रम म विधायक श्री मोती लाल साहू ह बरगद के पौधा लगाइन। गुरुपूर्णिमा के मौका म आज स्थानीय नागरिक मन ह घलोक इहां ‘एक पेड़ मां के नाम’ अभियान के तहत अपन मां के सुरता अऊ सम्मान म पौधरोपण करिन।
उप मुख्यमंत्री अउ नगरीय प्रशासन अउ विकास मंत्री श्री अरुण साव ह कार्यक्रम म कहिन कि गजराज बांध ल बचाय बर बोरियावासी मन के संघर्ष मैं अड़बड़ दिन ले देखत हंव। नागरिक अऊ ए बांध के संरक्षण म लगे संस्था मन के दृढ़ संकल्प अब पूरा होवइया हे। एला विकसित अऊ संरक्षित करे बर हरसंभव सहयोग प्रदान करे जाही। जन भावना के अनुरुप गजराज बांध के विकास अऊ सौंदर्यीकरण करे जाही।
विधायक श्री मोती लाल साहू ह कार्यक्रम म कहिन कि बोरिया के नागरिक अऊ बहुत अकन संस्था गजराज बांध के संरक्षण बर काम करत हे। हमन एला रायपुर शहर के सबले खूबसूरत पर्यटन स्थल बनाना चाहत हें। अम्युजमेंट पार्क, लाइब्रेरी, ऑडिटोरियम जइसे जन सुविधा इहां विकसित करे के योजना हे। रायपुर नगर निगम के आयुक्त श्री अबिनाश मिश्रा, बोरिया खुर्द गजराज बांध संरक्षण समिति के अध्यक्ष श्री पी.के. साहू, संरक्षक श्री एन.आर. नायडू, सचिव श्री क्षितिपाल, शहर जिला साहू संघ के अध्यक्ष श्री केशव साहू, ग्रीन आर्मी ऑफ छत्तीसगढ़ के संस्थापक श्री अमिताभ दुबे, पार्षद श्रीमती उमा चंद्रहास निर्मलकर, श्री रमेश वर्ल्यानी अऊ भारतीय जैन संघटना के बहुत अकन पदाधिकारी घलोक कार्यक्रम म मौजूद रहिन।
