नियद नेल्लानार योजना : माओवाद प्रभावित क्षेत्र मन म विकास के दस्तक

गांव वाले मन ल शासकीय योजना मन ले जोड़े सालातोंग म सुविधा शिविर जारी
31 जुलाई तक चिन्हांकित गांव मन म लगही सुविधा शिविर
रायपुर, मुख्यमंत्री श्री विष्णु देव साय के हुकुम के मुताबिक माओवाद प्रभावित दूरिहा-दूरिहा के अगम गांव वाले मन ल शासकीय योजना मन के शत प्रतिशत लाभ पहुंचाए खातिर विशेष सुविधा शिविर मन के आयोजन करे जात हे। नियद नेल्लानार योजना अंतर्गत ये शिविर शासन के योजना मन ल आमजनता तक पहुंचाए के संग सरकार अऊ समाज के बीच विश्वास के पुल घलोक बनत हे, जेखर से विकास के किरण सबले आखरी मनखे तक पहुंचत हे।
सालातोंग शिविर म शासन के योजना मन के मिलत हे लाभ
कोंटा विकासखंड के ग्राम पंचायत सालातोंग म 15 ले 17 जुलाई तक आयोजित शिविर म पोटकपल्ली, पालाचलमा अऊ पेंटापाड़ के गांव वाले मन ल लाभ पहुंचाए जात हे। शिविर म कई ठन विभाग मन के संग आधार कार्ड, जनधन बैंक खाता खोलना, वोटर आईडी कार्ड, जन्म प्रमाण पत्र, केसीसी, प्रधानमंत्री आवास योजना संग स्वास्थ्य विभाग कोति ले आयुष्मान कार्ड अऊ वय वंदन योजना के अंतर्गत वरिष्ठ नागरिक मन के स्वास्थ्य कार्ड बनाए जात हे। शिविर म बड़ संख्या म ग्रामीण पहुंचके योजना मन के लाभ लेवत हें। शिविर म पात्र हितग्राही मन ल शासकीय योजना मन ले लाभान्वित करे के संग शिविर मन के माध्यम ले स्वास्थ्य सेवा अऊ आन जरूरी जानकारी अऊ लाभ घलोक गांव वाले मन ल सीधा मुहैया कराए जात हे।
स्वास्थ्य सेवा ले लेके सामाजिक सुरक्षा तक
शिविर म आयुष्मान भारत प्रधानमंत्री जन आरोग्य योजना अऊ शहीद वीर नारायण सिंह स्वास्थ्य सहायता योजना के तहत पात्र गांव वाले मन के पंजीकरण करके आयुष्मान कार्ड बनाए जात हे, जेखर से ओ मन 5 लाख रूपिया तक के निःशुल्क स्वास्थ्य सेवा मिल सकय। संगे सियान नागरिक मन बर वय वंदन कार्ड बनाके ओ मन ल विशेष स्वास्थ्य सुविधा उपलब्ध कराए जात हे।
अवइया सुविधा शिविर
नियद नेल्लानार योजना के अंतर्गत सरलग शिविर लगाए जात हे, जेखर अंतर्गत माओवाद प्रभावित गांव मन म 31 जुलाई तक जिला के कई ठन चिन्हांकित गांव मन म शिविर लगाए जात हे। 23 ले 27 जुलाई तक ये शिविर दुलेड़ म आयोजित करे जाही जेमां दुलेड़, बुरकापाल अऊ एल्मागुंडा के ग्रामीण सामिल होही अऊ 29 ले 31 जुलाई तक गोलापल्ली म आयोजित शिविर म सिंगाराम, क्रिस्टाराम, गंगलेर अऊ मेहता के गांव वाले मन ल लाभान्वित करे जाही।