- जिला ल मिलीस 262 करोड़ के सौगात
- हमर सरकार के आतेच राजस्व सर्वे के काम होइस शुरू
रायपुर, 8 फरवरी 2020। छत्तीसगढ़ समेत देश के कई ठन राज्य मन के हजारों धावक अऊ केन्या के आए धावक घलोक ‘अबूझमाड़ पीस हॉफ मैराथन’ दौड़ म सामिल होइन। मनखे मन के ये जज्बा देखाथे के अब अबूझमाड़ म भय के नहीं भलुक शांति के वातावरण बनत हे। अबूझमाड़ बदलत हे, इहां अब विकास के कहानी लिखे जात हे। अइसन हम नहीं, ये क्षेत्र के मनखे अऊ बाहिर ले अवइया मन के मुह ले सुने जात हे। सरकार के पहली प्राथमिकता आदिवासी मन के संगेच ऊंखर क्षेत्र के विकास करना हे। अबूझमाड़ के मनखे मन ल रोजगार ले जोड़े जात हे। ये बात आज इहां ओरछा विकासखंड के ग्राम बासिंग म अबूझमाड़ पीस हाफ मैराथन के इनाम बांटे अउ निर्माण कार्य मन के लोकार्पण-भूमिपूजन-शिलान्यास कार्यक्रम म सामिल होए आए आबकारी अउ उद्योग मंत्री श्री कवासी लखमा ह जनता ल सम्बोधित करत मुख्य अतिथि के आसंदी ले कहिन। उमन कहिन कि हमर सरकार के आतेच कई बछर ले अबूझ रहे ये क्षेत्र म अब राजस्व सर्वे के काम शुरू करे जात हे। जेखर से मनखे मन ल अब उंखर जमीन के मालिकाना हक मिले म आसानी होही।
मंत्री श्री कवासी लखमा ह जनता ल संबोधित करत कहिन कि अबूझमाड़ चारों मुड़ा ले घना जंगल अऊ पहाड़ ले घिरे हे। इहां के भौगोलिक विषम परिस्थिति मन के सेती कई समस्या हे। एखर सेती इहां के युवा मन ल रोजगार, के संगेच विवाह समारोह आदि म घलोक दिक्कत होत रहिस, फेर अब अइसन नइ हे। ये क्षेत्र म अब छत्तीसगढ़ के ही नहीं भलुक देश के कई ठन राज्य अऊ विदेश ले आए मनखे मन घलोक दौड़े अऊ अबूझमाड़ के कला संस्कृति ल समझे-देखे आए लगे हे। इहां बर ये सुखद बात हे। क्षेत्र के विकास बर राज्य सरकार के कई योजना चलत हे। एखर से ये ईलाका के ही नहीं भलुक पूरा बस्तर क्षेत्र के विकास होही। अब अबूझमाड़ म आवागमन के साधन सुगम अऊ सरल हो गए हे। मनखे एक जगा ले दूसर जगा तक असानी ले पहुंचत हें।
