मुख्यमंत्री ह बौद्धिक भ्रमण म आए सुकमा जिला के युवा मन ले करिन आत्मीय मुलाकात
मुख्यमंत्री ले मिलके नक्सल प्रभावित क्षेत्र के युवा मन के खिलिस चेहरा
रायपुर, मुख्यमंत्री श्री विष्णुदेव साय ह काली मंत्रालय महानदी भवन म बौद्धिक भ्रमण म आए सुकमा जिला के युवा मन ले मुलाकात करिन। मुख्यमंत्री श्री साय ह युवा मन ले उंखर हाल-चाल जानिन अऊ राजधानी रायपुर म उंखर स्वागत करिन। मुख्यमंत्री ह युवा मन ले कहिन के ओ मन अड़बड़ पढ़ंय अऊ आगू बढ़ंय। छत्तीसगढ़ सरकार ऊंखर संग खड़े हे। मुख्यमंत्री ले मिलके नक्सल प्रभावित क्षेत्र के युवा मन के चेहरा खिल उठे हे। ए बेरा म उपमुख्यमंत्री श्री विजय शर्मा घलोक उपस्थित रहिन।
मुख्यमंत्री श्री विष्णुदेव साय ह सुकमा जिला के युवा मन ले आत्मीय चर्चा करिन। उमन कहिन के नक्सली विकास विरोधी हें। ओ मन नइ चाहंय के बस्तर के मनखे मन ल पानी, बिजली, सड़क अऊ विद्यालय जइसे बुनियादी सुविधा मिलय। सरकार के प्राथमिकता बस्तर के विकास हे। बहुत जल्दी बस्तर ले नक्सलवाद खतम होही।
मुख्यमंत्री ह बड़ प्रेम से प्रदेश के सुदूर क्षेत्र ले आए ए युवा मन ले बातचीत करिन अऊ ऊंखर बारे म जानकारी लीन। मुख्यमंत्री ह युवा मन ले पूछिन के ओ मन ल रायपुर आके कइसे लगत हे ? जेखर जवाब म युवा मन ह बताइन के ऊंखर दल के अधिकतर युवा पहली पइत राजधानी रायपुर आए हें। अधिकांश ह ए भ्रमण के समय पहली पइत जगदलपुर ल देखे हें। पहली पइत अपन गांव ले रायपुर आके बहुत अच्छा लगत हे। नवा-नवा चीज देखे ल मिलत हे। आज ओ मन ल मंत्रालय ल देखे अऊ इहां के कार्यप्रणाली समझे के अवसर मिलीस। मुख्यमंत्री ह कहिन के निश्चित रूप ले ये अनुभव आप मन बर लाभदायक रहिही। ए भ्रमण के पूरा लाभ उठावव अऊ खुद ल समृद्ध करव।
मुख्यमंत्री श्री साय ह सुकमा के युवा मन ले विशेष रुप ले उंखर शिक्षा के विसय उपर चर्चा करिन। कई आयुवर्ग के युवा मन ह मुख्यमंत्री ल बताइन के ओ मन दसवीं, बारहवीं संग कॉलेज तक म पढ़त हें। सहज सरल मुख्यमंत्री श्री विष्णुदेव साय ले युवा मन ह खुलके गोठबात करिन। ए बरा म एक छात्र ह मुख्यमंत्री ल बताइस के वो बीएससी के सेकेंड ईयर म पढ़त हे, उहें एक छात्र ह खुद खड़े होके मुख्यमंत्री ल बताइस के वो घलोक बीए फाइनल के विद्यार्थी हे। मुख्यमंत्री श्री साय ह युवा मन के पढ़ाई के प्रति रुचि के सराहना करिन अऊ अइसनहे पढ़ लिख के आगू बढ़े बर उंखर हौसला बढ़ाइन।
जानबा हे कि स्वामी विवेकानंद युवा प्रोत्साहन योजना अंतर्गत नियद नेल्लानार कार्यक्रम के तहत बस्तर संभाग के युवा मन के बौद्धिक भ्रमण कार्यक्रम आयोजित करे जात हे। इही कड़ी म सुकमा जिला के 95 युवा मन दू दिन के भ्रमण म राजधानी रायपुर आए हें। ए दल म 77 बालक अऊ 18 बालिका हावंय।
अड़बड़ पढ़व अऊ आगू बढ़व, सरकार तुँहर संग हे- मुख्यमंत्री श्री साय
