गौठान मन म गाय मन ल हरियर चारा खवाए बर 631 एकड़ म चारागाह के विकास
बलौदाबाजार, जिला नरवा, गरूवा, घुरुवा, बाड़ी योजना के अंतर्गत पूरा जिला म 303 चारागाह विकसित करे के योजना बनाए गए हे। जेमां ले शत प्रतिशत 303 चारागाह मन के निर्माण पूरा हो गए हे। जिला के सबो चारागाह मन म फेसिंग घलोक पूरा कर ले गए हे। ए चारागाह मन म गाय मन ल खवाए बर करीबन 631 एकड़ क्षेत्र म चारा के बोआई करे गए हे। एमां नेपियर, मक्का अऊ ज्वार जइसे पौष्टिक चारा प्रमुख रूप ले सामिल हे। जिला म राज्य सरकार के योजना नरवा, गरूवा, घुरुवा, बाड़ी अंतर्गत पहिली चरण म 71 चारागाह अऊ दूसर चरण म 96 चारागाह, तीसर चरण म 40 अऊ चंउथइया चरण म 96 चारागाह स्वीकृत करे गये हे। ये प्रकार ले जिला म कुल 303 चारागाह स्वीकृत हे। जेखर तहत कुल 631एकड़ जमीन म चारा के उत्पादन करे जात हे। ए चारागाह मन म नेपियर घास के 4 लाख 41 हजार 750 रूट्स अऊ आन बीज जइसे मक्का,बाजरा के करीब 5 हजार 621किलोग्राम के रोपण करे गए हे। जेखर से करीबन 45 सौ क्विंटल हरियर चारा के उत्पादन होए के संभावना हे। जेन ल जिला के गौठान मन म अवइया करीबन 40 हजार पशु मन ल हरियर चारा प्रदान करे जाही। ए चारा मन के सेवन ले करीबन 25 ले लेके 30 प्रतिशत तक दूध उत्पादन अऊ गाय मन के स्वास्थ्य उपर प्रत्यक्ष सकारात्मक प्रभाव परही। चारागाह मन के उपयोग गौठान प्रबंधन समिति के माध्यम ले गौठान म रखे गये पशु मन बर करे जाही। जेखर से गांव वाले मन के आर्थिक स्थिति म बढ़ोतरी होही, संगे-संग गोबर उत्पादन ले घलोक आय अर्जित करे जा सकही। हर एक गौठान म हरियर चारा अऊ पैरा ल काटे बर हाथ अऊ विद्युत चलित चाफ कटर के व्यवस्था करे जात हे, जेखर से चारा अऊ पैरा के पूरा उपयोग होही अऊ बर्बादी नइ होवय। एखर संगेच 223 चारागाह मन म सिंचाई के सुविधा उपलब्ध हे अऊ 80 म अभी घलोक सिंचाई सुविधा उपलब्ध नइ हे। जेकर बर सरलग सिंचाई सुविधा उपलब्ध कराए बर काम करे जात हे।