स्टार्टअप्स ईकोसिस्टम के विकास बर छत्तीसगढ़ राष्ट्रीय स्तर म सम्मानित
‘एस्पायरिंग लीडर‘ के रूप म छत्तीसगढ़ ल करे गीस सम्मानित
केन्द्रीय मंत्री श्री पीयूष गोयल ह नई दिल्ली म आयोजित कार्यक्रम म करिस सम्मानित
मुख्यमंत्री श्री बघेल अऊ उद्योग मंत्री श्री कवासी लखमा ह उद्योग विभाग ल दीन बधाई
नवा औद्योगिक नीति 2019-24 म स्टार्टअप इकाई मन बर लागू करे गए हे विशेष पैकेज
राज्य म कुल 748 स्टार्टअप पंजीकृत
रायपुर, छत्तीसगढ़ के नीति मन ल एक पईत फेर केन्द्र सरकार ह सहराए हे। केन्द्रीय उद्योग संवर्धन अउ अंदर के व्यापार विभाग कोति ले आज स्टेट्स स्टार्टअप रैंकिंग के घोषणा करे गीस। केंद्रीय वाणिज्य अउ उद्योग मंत्री श्री पीयूष गोयल ह नई दिल्ली म आयोजित कार्यक्रम म छत्तीसगढ़ ल प्रदेश म स्टार्टअप्स ईकोसिस्टम के विकास बर एस्पायरिंग लीडर के रूप म सम्मानित करिस।
मुख्यमंत्री श्री भूपेश बघेल अऊ उद्योग मंत्री श्री कवासी लखमा ह ये उपलब्धि बर उद्योग विभाग के अधिकारी-कर्मचारी मन ल बधाई देहे हें। जानबा हे कि छत्तीसगढ़ के अभी हाल औद्योगिक नीति 2019-24 के अंतर्गत स्टार्टअप इकाइ मन ल लाभान्वित करे बर स्टार्टअप पैकेज लागू करे गए हे। राज्य म कुल 748 स्टार्टअप पंजीकृत हे। एस्पायरिंग लीडर के रूप म छत्तीसगढ़ ल प्रदान करे गए प्रशस्ति पत्र म ये उल्लेख करे गए हे कि छत्तीसगढ़ सरकार कोति ले स्टार्टअप ल प्रोत्साहित करे बर कई सराहनीय पहल करे गए हे। जेमें स्टार्टअप पॉलीसी के स्थापना, स्टार्टअप्स बर कर म छूट अऊ अनुदान के प्रावधान अऊ इन्क्यूबेटर्स के स्थापना अऊ ओखर उन्नयन प्रमुख पहल हे। इन्क्यूबेटर्स के माध्यम ले स्टार्टअप्स बर को-वर्किंग स्पेस, मेंटरशिप, फंडिंग अऊ प्रौद्योगिकी सपोर्ट के प्रावधान करे गए हे।
केन्द्रीय मंत्री ह स्टार्टअप क्षेत्र म विशेष योगदान बर छत्तीसगढ़ के तीन अधिकारी श्री अनुराग पांडेय, विशेष सचिव वाणिज्य अउ उद्योग विभाग, श्री प्रवीण शुक्ला अपर संचालक उद्योग, अउ श्रीमती सुमन देवांगन सहायक संचालक ल सम्मानित करिस।
जानबा हे कि छत्तीसगढ़ राज्य औद्योगिक नीति- 2019-24 के अंतर्गत स्टार्टअप इकाई मन ल प्रोत्साहित करे बर छत्तीसगढ़ राज्य स्टार्टअप पैकेज लागू करे गए हे। भारत सरकार कोति ले मान्यता प्राप्त इकाई मन ल छत्तीसगढ़ म स्थापित होए म विशेष प्रोत्साहन पैकेज घोषित करे गए हे। पैकेज के तहत ब्याज अनुदान 70 प्रतिशत 11 साल बर, स्थायी पूंजी निवेश अनुदान 55 प्रतिशत, नेट एसजीएसटी प्रतिपूर्ति 15 साल तक, विद्युत शुल्क छूट 10 साल तक अउ पात्रता मुताबिक औद्योगिक नीति 2019-24 म निरधारित आन अनुदान जइसे भू-प्रब्याजी म छूट, स्टाम्प शुल्क छूट, परियोजना प्रतिवेदन म छूट आदि के सुविधा प्रदान करे जात हे। स्टार्टअप ल तीन बछर तक भवन किराया के 40 प्रतिशत, जेकर सीमा 8 हजार रूपिया प्रति महिना देहे जात हे अऊ स्टार्टअप इकाई मन सेमिनार, वर्कशॉप, संगोष्ठी, प्रदर्शनी म हिस्सा लेना म 50 प्रतिशत के प्रतिपूर्ति, जेकर सीमा एक लाख रूपिया प्रति साल होही, देहे जात हे। राज्य म स्टार्टअप ल प्रोत्साहित करे खातिर इन्क्यूबेटर के स्थापना बर व्यय के 50 प्रतिशत राशि 50 लाख रूपिया अउ संचालन बर 3 लाख रूपिया प्रति साल अनुदान के रूप म देहे जात हे।
औद्योगिक पुरस्कार योजना पुरस्कार योजना के अंतर्गत स्टार्टअप श्रेणी म घलोक पुरस्कार देहे के प्रावधान करे गए हे। पहिली, दूसर अउ तीसर पुरस्कार के रूप म 1,51,000 रूपिया, 1,00,000 रूपिया अउ 51,000 रूपिया के राशि अउ प्रशस्ति पत्र देहे के प्रावधान करे गए हे।
