80 ले जादा प्रजाति मनके चिन्हारी, बैदराज अऊ पढ़इया लइका मन लीन भाग
बलौदाबाजार-भाटापारा, जिला के वनमंडल बलौदाबाजार के देवपुर परिक्षेत्र म सुकरवार के दिन जड़ी-बूटी अऊ दवई वाले औषधीय वनस्पति मन के चिन्हारी अऊ ओखर महत्व उपर अधारित एक दिन के बॉटनाइजेशन कार्यशाला रखे गीस। ये कार्यशाला हा वन मंत्री श्री केदार कश्यप के कहे अऊ प्रधान मुख्य वन संरक्षक अऊ वन बल प्रमुख अरुण कुमार पांडेय के देख-रेख म आयोजित करे गीस।
ये कार्यशाला के मुख्य उदेस जंगल क्षेत्र म मिलइया दवई वाले पौधा मनके पहचान कराना, ओखर छाल, पाना, डांड़, जड़, फल अऊ फूल के आधार म ओखर फरक सिखाना अऊ ओखर दवई वाले महत्व के जानकारी देना रहिस।
80 ले जादा प्रजाति मनके पहचान
ये कार्यक्रम म अर्जुन, आंवला, बहेड़ा, बेल, काली मुसली, हाथीपांव, दूधी, भुईनीम, सतावर, खरहर, ठेलका, नरनारी, गरुड़ संग लगभग 80 ठन जड़ी-बूटी अऊ दवई वाले बोटका प्रजाति मनके पहचान कराय गीस। जानकार मनहा ये प्रजाति मनके परयावरण म ब्यवहार, ओमनला बचाय के जरूरत अऊ फल, फूल, पाना, जड़ मनके माध्यम ले कतको किसम के बेमारी मनके इलाज म उपयोग के सुग्घर जानकारी दीन। सुग्घर, निरोग अऊ लंबा जिन्दगी जिए के मनखे मनके रहन-सहन बर कुदरत उपर अधारित गियान के महत्व उपर घलो बने गोठ बात होइस।
वैदराज मन ले लेके पढ़इया लइका मन तक लीन भाग
ये कार्यशाला म वनमंडल बलौदाबाजार, वनमंडल कवर्धा अऊ उदंती-सीतानदी टाइगर रिजर्व के अधिकारी-कर्मचारी मन उपस्थित रहिन। एखर संगे च पुरखा मनके जनवाये जड़ी-बूटी के गियान रखइया बैदराज मन, वन प्रबंधन समिति के सदस्य मन, बारनवापारा के गाइड मन अऊ बड़ संख्या म पढ़इया लइका मनहा घलो बड़ उसाह के संग हिस्सा पाइन।
वन मंडल अधिकारी बलौदाबाजार धम्मशील गणवीर हा कहिन के कार्यशाला के मतलब सिरिफ दवई के गियान ला बांटना नो हे, एखर असली उदेस ये गियान ला समाज के जादा ले जादा मनखे मन तक पहुंचाके रूख-राई अऊ बोटका मनके महत्व बर जागरूकता बढ़ाना हे अऊ परयावरण ला बचाय म सबो मनखे के साथ ला बढ़ावा देना घलो हे।