देवांगन समाज जागरूक बनके समाज ल आगू बढ़ावय : मंत्री डॉ. डहरिया

रायपुर, 17 फरवरी 2021। नगरीय प्रशासन मंत्री डॉ. शिवकुमार डहरिया ग्राम पलौद म देवांगन समाज कोति ले आयोजित मां परमेश्वरी जंयती म सामिल होइन। ये बेरा उमन माँ परमेश्वरी के पूजा अर्चना करिन। देवांगन समाज के कार्यक्रम म पहुचे मुख्य अतिथि डॉ. शिवकुमार डहरिया ह कहिन के देवांगन समाज बहुत मेहनती अऊ स्वाभीमानी हे। अपन मेहनत अऊ परिश्रम के बल म समाज के मनखे जीवनयापन करत हें। कोनो समाज म जागरूकता अऊ एकता समाज ल आगू बढ़ाए म मददगार साबित होथे अऊ ये जागरूकता बिना शिक्षा ले जुड़े संभव नइ हे। आप मन के लइका बने सहिन पढ़ही, डॉक्टर, इंजीनियर, कलेक्टर, एसपी बनहीं त आप मन के आर्थिक स्थिति मजबूत होही। गरीबी दूर होही अऊ आप मन बेहतर तरीका ले जीवनयापन कर पाहू। ते पाए के समाज के मनखे अपन लइका मन ल स्कूल-कॉलेज भेजव। अपन घर के लड़की मन ल घलोक पढ़ावव अऊ एक अच्छा इंसान बनावव। उमन समाज बर पलौद म सामुदायिक भवन बर 5 लाख के राशि स्वीकृत करे के घलोक घोषणा करिन।
मंत्री डॉ. डहरिया ह आगू कहिन के मुख्यमंत्री के नेतृत्व म प्रदेश के सरकार सबो समाज अऊ वर्ग के विकास बर काम करत हे। देवांगन समाज बड़ संख्या म छत्तीसगढ़ म रहिथे। ये बेरा म जनपद अध्यक्ष खिलेश देवांगन, कोमल साहू संग समाज के मनखे अऊ क्षेत्र के जनप्रतिनिधिगण उपस्थित रहिन।