रायपुर, 21 मार्च 2021। देश संग प्रदेश म कोरोना वायरस खतरा ल देखत डीजीपी डी.एम. अवस्थी ह छत्तीसगढ़ के सबो पुलिस अधीक्षक मन ल तुरंते फरमान जारी करके सबो ट्रेनिंग, मुलजिम पेशी अऊ वारंट तामीली बर पुलिस मन ल बाहिर झन भेजे ल कहे हें अउ पुलिस मन के सरकारी काम काज बर बाहिर जाय म घलव रोक लगा देहे हें।
डीजीपी डीएम अवस्थी ह सबो पुलिस अधीक्षक ल हुकुम देहे हें के सबो पुलिस लाईन अउ प्रशिक्षण केंद्र मन म चलत प्रशिक्षण ल तुरंते स्थगित करे जाए। प्रदेश के सबो न्यायालय म न्यायलीन प्रक्रिया म रोक लगे हे अइसे म समंस/ वारंट अऊ मुलजिम पेशी म घलोक पुलिस कर्मचारी मन ल झन भेजे के निर्देश देहे गे हे।
कुछु काम खतिर कहूं पुलिस ल राज्य ले बाहिर जाना जरूरी होवय त डीजीपी के अनुमति लेहे जाए। राज्य के भीतर घलोक एक जिला ले दूसर जिला म पुलिस अधिकारी, कर्मचारी के आवागमन उपर तुरंते रोक लगाय के निर्देश हे। थाना म कोनो मनखे ल पूछताछ बर जरूरी होवय तभे बलाए बर कहें हें नइ त मना करें हें। कहूं कोनो मनखे के गिरफ्तारी जरूरी हे त ओखर विरूद्ध जल्दी कार्रवाई करत न्यायालय म पेश करे ल कहे गए हे। प्रदेश के बाहिर गए अधिकारी, कर्मचारी के लहुटे म जरूरी स्वास्थ्य परीक्षण के निर्देश तको देहे हें। फरमान म कहे गए हे के यथासम्भव पुलिसकर्मी मन के ड्यूटी फिक्स पिकेट अउ पेट्रोलिंग म लगाए जाय। कोरोना वायरस संक्रमण के रोकथाम बर बाहरी मनखे ले निश्चित दूरी बनाए रखे बर तको निर्देशित करे गए हे।
