धान न ही, अब चना के खेती ले मिलत हे मुनाफा

किसान मन बर लाभकारी फसल चक्र बदलाव
धमतरी, किसान अब परंपरागत धान के खेती के बजाय चना, मूंग अऊ सरसों जइसे दलहन-तिलहन फसल के खेती ल अपनाए लगे हें। धमतरी जिला के किसान मन ह ए पइत गर्मी के मौसम म फसल विविधिकरण के जेन नवा रद्दा अपनाए हें, एकर फायदा ओ मन ल सीधा मिलत हे। कम लागत, कम पानी म जादा मुनाफा।
भूजल स्तर सरलग गिरे के सेती जिला प्रशासन ह किसान मन ल फसल चक्र बदलाव बर प्रेरित करत हें। गांव-गांव म जल संरक्षण बर जल-जगार महोत्सव अऊ फसल चक्र बदलाव शिविर आयोजित करे जात हे। ए उदीम के असर ये होय हे के किसान मन ह ए पइत धान के जगह चना के खेती करे हें, जेन कम पानी म बनेच पैदावार देथे।
किसान मन ल उंखर मेहनत के फल घलोक मिलत हे। सरकार कोति ले पहली पइत चना के समर्थन मूल्य म खरीदी करे जात हे। 1 मार्च ले 31 मई तक 5650 रूपिया प्रति क्विंटल के दर ले चना खरीदी होवत हे। धमतरी जिला म 8 समिति मन के माध्यम ले 2144 किसान मन ह अब तक 19 हजार 850 क्विंटल चना बेचे हे, जेकर कुल राशि 11 करोड़ 21 लाख 53 हजार रूपिया हे। भुगतान घलोक सीधा किसान मन के खाता म पहुंचत हे।
अमलडीह के किसान भुनेश्वर साहू बताइस के धान के तुलना म चना के खेती ले पानी घलोक बाचे हे अऊ मुनाफा घलोक मिले हे। पैसा घलोक समय म मिल गे। उहें किसान घुरसिंह साहू ह कहिस, मोला 56 हजार रुपिया ले जादा के राशि सीधा खाता मिले हे। पहली पइत शासन ह चना खरीदी करे हे, जेखर से हम किसान मन ल बहुत लाभ होय हे।
कलेक्टर अविनाश मिश्रा ह बताइस के फसल चक्र बदलाव ले भूजल स्तर ल बचाय अऊ जमीन के उर्वरता बनाए रखे म मदद मिलत हे। धान के जगा चना, मूंग, सरसों जइसे फसल लगाय बर किसान मन ल सरलग प्रेरित करे जात हे। संगेच ए मन ल समर्थन मूल्य म खरीदी अऊ आन सरकारी सहायता घलोक देहे जात हे। धमतरी म किसान मन के ये बदलाव अब एक सफलता के कहानी बन गए हे। एखर से ये साबित होथे के कहूं सही मार्गदर्शन, सरकारी सहयोग अऊ किसान मन के मेहनत एक संग मिल जाए, त खेती ल फायदा के सौदा बनाय जा सकत हे।