धान बेचे पहुंचे किसान बोलिस अब नइ लगय लाइन, नइ होवय दौड़ा-भागी! नवा खरीदी व्यवस्था ह बढ़ाइस किसान मन के हौसला

धमतरी, छत्तीसगढ़ म समर्थन मूल्य म धान खरीदी व्यवस्था ए साल अऊ जादा सरल, पारदर्शी अऊ किसान-केंद्रित साबित होवत हे। राज्य सरकार कोति ले खरीफ विपणन साल 2025–26 खातिर 15 नवंबर ले शुरू करे गए धान खरीदी ह किसान मन म नवा विश्वास के संचार करे हे। ग्रामीण अर्थव्यवस्था म फेर रौनक लहुटत दिखत हे।
धमतरी जिला म धान खरीदी ल लेके किसान मन म जबरदस्त उत्साह देखे जात हे। जिला के 100 उपार्जन केंद्र मन म 19 नवंबर तक 3,431 किसान मन ले 1,56,761 क्विंटल धान बिसाए जा चुके हे। ये आंकड़ा बताथे के किसान मन के भरोसा सरकारी खरीदी प्रणाली म सरलग मजबूत होय हे।
ग्राम संबलपुर के किसान दीपेश कुमार देवांगन धान बेचे पहुंचिस त वो ह कहिस के ए पइत के प्रक्रिया पहिली ले कई गुना आसान हे। ओखर कहना हे के ऑनलाइन टोकन सिस्टम ह सबले बड़ समस्या—लंबा कतार अऊ घंटों इंतजार—पूरा खतम कर देहे हे। निरधारित समय म टोकन मिले ले न भीड़ होवत हे, न अव्यवस्था, अऊ किसान अपन पारी म तुरंत धान तउलवा पात हें।
दीपेश ह ए साल 76 क्विंटल धान बेचे हे। वो ह बताइस के पउर साल समय म भुगतान मिले ले खेती के काम मन म काफी सुविधा हो गए रहिस। ए पइत घलोक ओ मन ल जल्दी भुगतान के भरोसा हे, ताकि कृषि सुधार, बीज-खाद खरीदी अऊ पारिवारिक जरूरत मन म धान बिक्री के राशि के उपयोग कर सकंय। ओ मन कहत हें कं अब खरीदी केंद्र म बिचौलिया मन के कोनो भूमिका नइ रह गए हे अऊ कर्मचारी मन के व्यवहार घलोक सहयोगपूर्ण हे।
दीपेश के संगे-संग किसान हंसराज, शत्रुघन अऊ कई आन किसान मन ह घलोक ए साल के खरीदी व्यवस्था ल सहराइन। ओखर कहना हे के प्रशासन कोति ले करे गए सुधार—जइसे तेज मापन, ऑनलाइन पारदर्शिता, बेहतर व्यवस्थापन अऊ सरलग निगरानी ह पूरा तंत्र ल बेहद विश्वसनीय बनाय हे। एखर से अब किसान बिना तनाव के अपन धान बेच पात हें।