धमतरी: इंजिनियरिंग के पढ़ाई करके एकलव्य साहू ह करत हे खेती-किसानी

मिरचा के फसल ले प्रति एकड़ दू लाख रूपिया तक के होवत हे शुद्ध आमदनी
धमतरी, आजकल जिहां युवा पीढ़ी पढ़-लिखके कई ठन नौकरी कोति भागत हें, उहें जिला के मगरलोड विकासखण्ड स्थित ग्राम दुधवारा के युवा एकलव्य साहू ह इंजीनियरिंग के पढ़ाई करके खेती-किसानी कोति आगू बढ़त हे। शिक्षित होए के संगे-संग ओ ल खेती-किसानी के तकनीकी जानकारी हासिल करे म दिलचस्पी हे। एखरे सेती एकलव्य ह अपन खेत मन म कम लागत अऊ कम पानी म जादा उपज प्राप्त होवइया मसाला क्षेत्र विस्तार के तहत मिरचा के फसल लेवत हे।
दुधवारा गांव के युवा किसान एकलव्य साहू बताथे के ओ ह साल 2017-18 म इंजीनियरिंग पास करके खेती-किसानी करना चाहत रहिस, एखर बर वो ह उद्यानिकी विभाग ले सम्पर्क करिस। एकलव्य के बताती उद्यानिकी विभाग के मार्गदर्शन ले ओ ल राष्ट्रीय कृषि विकास योजनान्तर्गत ड्रिप सिंचाई, पैक हाउस, बीज पैक योजना आदि के जानकारी मिलिस अऊ एखर बर मिलइया अनुदान के बारे म घलोक पता चलिस। अनुदान के लाभ लेके एकलव्य अपन 12 एकड़ क्षेत्र म मिरचा के फसल लेहे शुरू कर दीस। ओ ह बताथे के ओ ल मिरचा के खेती ले प्रति एकड़ 100 ले 110 क्विंटल उपज प्राप्त होथे अऊ प्रति एकड़ दू लाख रूपिया के शुद्ध आमदनी हासिल होवत हे। एकलव्य बताथे के वइसे तो वोखर मिरचा जिला म ही हाथों-हाथ बिक जाथे, फेर ओ ह आन जिला मन म घलोक मिरचा ल बिक्री बर भेजथे। शासन के योजना मन के तहत मिले अनुदान अऊ उद्यानिकी विभाग के मार्गदर्शन बर एकलव्य शासन-प्रशासन के धन्यवाद ज्ञापित करत हे।