करीबन एक लाख रूपिया के अवैध सागौन अऊ बीजा चिरान के जप्ती: वनमण्डल धमतरी करिस छापामार कार्रवाई

धमतरी, 07 मार्च 2021। वनमण्डल धमतरी के दुगली परिक्षेत्र के चारगांव म श्री रोमलाल वल्द दुकालुराम के घर म वन विभाग कोति ले काली 06 मार्च के निशान देही के आधार म अचानक दबिश देहे गीस। वनमण्डलाधिकारी धमतरी श्रीमती सतोविशा समाजदार के मार्गदर्शन म गठित टीम ह उहां जांच करत बेरा श्री रोमलाल के घर ले अवैध रूप ले सकेले गए 2.150 घनमीटर सागौन, बीजा चिरान काष्ठ के जप्ती के कार्रवाई करे गीस। ए कर अनुमानित कीमत करीबन एक लाख रूपिया आंके गए हे।
एखर पहिली नगरी परिक्षेत्र के विभागीय अमला ह हाथी मन उपर निगरानी रखे बर क्षेत्र म भ्रमण करे जात हे, ये दौरान 5 मार्च के रात म 2 बजे के आस-पास डोंगरडुला जबरा चौक म 2 सायकल वाले मन ले 5 नग सागौन चिरान सिलपट जब्त करे गए रहिन। एमां ले एक राजू वल्द रोमलाल वट्टी राम के अंधियार के फायदा उठाके भाग गीस। दूसर मनखे कविलाल वल्द तेजु राम गोड़ ग्राम चारगांव के निशान देही म रोमलाल के घर म छापा मारके ओ वनोपज ल जब्त करे गीस। इही मनखे के निशान देही म चारगांव ले करीबन 4 कि.मी. अंदर जंगल म कक्ष नंबर 330, चारगांव बीट म अतिक्रमण करके झोपड़ी बनाके रहत जेठू राम कमार वल्द सुमर सिंग कमार साकिन खरका ल समझा बुझाके वोखर झोपड़ी वोकरे ले तोड़वा के वन जमीन ल कब्जामुक्त कराए गीस। एमां संबंधित आरोपी मन के खिलाफ वन अपराध के प्रकरण दर्ज करके जरूरी कार्रवाई करे जात हे। ये कार्यवाही म वनमंडलाधिकारी धमतरी श्रीमति समाजदार ह मौका म पहुँचके सबो विभागीय अधिकारी-कर्मचारी मन ल मार्गदर्शन दीन। कार्रवाई म उप वनमंडलाधिकारी नगरी श्री आलोक बाजपेयी, उप वनमंडलाधिकारी बिरगुड़ी श्री हरीश पाण्डेय, परिक्षेत्र अधिकारी दुगली श्री अनिल वर्मा, परिक्षेत्र अधिकारी नगरी श्री जी. एस. परमार अऊ श्री मुधकर, श्री संदीप सोम, श्री.जी.पी. वर्मा, मो. रिजवान आदि वन कर्मचारी सामिल रहिन।