दुर्ग, संभागायुक्त श्री महादेव कांवरे आज उदुपहा जांच बर धमधा ब्लाक म पहुंचिन। इहां उमन तहसील कार्यालय के अलावा रजिस्ट्री कार्यालय, जलजीवन मिशन के काम अऊ गौठान मन के निरीक्षण करिन। सबले पहिली ओ मन तहसील कार्यालय पहुंचिन। तहसील म उमन सबो पंजीकृत प्रकरण मन के निरीक्षण करिन अऊ तहसील कार्यालय आये मनखे मन ले बातचीत घलोक करिन। केस पेंडिंग रखे के शिकायत म उमन नायब तहसीलदार कार्यालय धमधा के सहायक ग्रेड 3 श्री बीएल सिन्हा ल निलंबित करे के निर्देश दीन। एक केस फरवरी 2021 ले अब तक पेंडिंग रहिस। संभागायुक्त ह हर हफ्ता पेशी रखके एला जल्दी निपटाए के हुकुम दीन। मौका म एक प्रकरण आनलाइन दर्ज नइ पाए गीस। संभागायुक्त ह कहिन कि आफलाइन के तुरंत बाद प्रकरण ल आनलाइन चढ़ाना घलोक बहुत जरूरी हे ये मां देरी बर्दाश्त नइ करे जाए। संभागायुक्त ह प्रकरण मन के समीक्षा करिन अऊ उमन ल लउहे निपटाए के हुकुम दीन। उहां उमन अधिकारी मन ल कहिन कि शासन ह लोक सेवा गारंटी के अंतर्गत समय सीमा रखे हे। सबो प्रकरण मन के निपटारा उही समय सीमा के भीतर होना चाही। राजस्व संबंधी प्रकरण मन के जल्दी निपटारा सरकार के सबले बड़े प्राथमिकता ये, एखर सरलग मानिटरिंग करव।
ये बेरा म सहायक कलेक्टर श्री हेमंत नंदनवार, एसडीएम श्री बृजेश क्षत्रिय अउ तहसीलदार श्री रामकुमार सोनकर घलोक उपस्थित रहिन। तहसील कार्यालय के निरीक्षण के समय उमन तहसील कार्यालय पहुंचे नागरिक मन ले चर्चा घलोक करिन। दुर्गा बाई ह बताइस कि ओ ह अवैध कब्जा के शिकायत लेके आए हे। भिलौरी के लवकुश ह बताइस कि ओ ह सीमांकन के आवेदन लेके आए हे। संभागायुक्त ह इंकर प्रकरण के शीघ्र निराकरण के निर्देश अधिकारी मन ल दीन।
संभागायुक्त ह लोक सेवा केंद्र के निरीक्षण घलोक करिन अऊ उहां आए आवेदन मन के जानकारी लीन। ओ मन उप पंजीयक कार्यालय घलोक पहुंचिन, इहां लोक सेवा गारंटी के पंजी संधारित नइ करे गए रहिस, एला लेके उमन नाराजगी जाहिर करिन अऊ उप पंजीयक श्री प्रेमलाल धुर्वे ल शो काज नोटिस जारी करे के निर्देश दीन।
संभागायुक्त ह गौठान मन के निरीक्षण घलोक करिन। ये दौरान संयुक्त संचालक कृषि श्री राठौर घलोक मौजूद रहिन। उमन परसबोड़ अऊ बरहापुर म गौठान मन के निरीक्षण करिन। इहां चलत रोजगारमूलक गतिविधि मन म उमन प्रशंसा जाहिर करिन अऊ समूह के महिला मन ल मशरूम उत्पादन जइसे आन गतिविधि घलोक सुरू करे ल कहिन। संभागायुक्त ह कहिन कि स्थानीय बाजार के जरूरत ल चिन्हांकित करत सबले जादा गतिविधि सुरू करव। जतके अलग-अलग प्रकार के नवाचार करहू, वोतकेच लाभ मिलही। गौठान ले संबंधित मवेशि मन के संख्या जइसे जरूरी पंजी मन के संधारण नइ होए म उमन बरहापुर के सचिव पुनीत कोठारी अऊ परसबोड़ के सचिव अशोक पारकर ल शो काज नोटिस देहे के हुकुम दीन।
संभागायुक्त ह धमधा ब्लाक के गांव मन म जलजीवन मिशन के काम मन के निरीक्षण घलोक करिन। ये बेरा म अधीक्षण अभियंता श्री राजेश गुप्ता अउ कार्यपालन अभियंता श्री समीर शर्मा घलोक उपस्थित रहिन। संभागायुक्त ह कहिन कि जलजीवन मिशन के काम प्राथमिकता के हे जतके युद्धस्तर म काम होही, मनखे मन के समस्या वोतकेच जल्दी हल होही। उमन ए काम मन के गुणवत्ता के लगातार मानिटरिंग के निर्देश घलोक अधिकारी मन ल दीन। जानबा हे कि नंदवाय म 275 नल कनेक्शन स्थापित हो गे हे अऊ भिम्भौरी म 70 कनेक्शन स्थापित हो गे हे एखर अलावा दू सोलर पंप लगाए गए हे।
धमधा तहसील के उदुपहा जांच म पहुंचिन संभागायुक्त, नागरिक मन के शिकायत म सिन्हा बाबू ल करिन निलंबित
