धमतरी : मुख्यमंत्री मितान योजना म जोरे गीस एक अऊ सेवा, अब घर बइठे बनही पैनकार्ड

धमतरी, धमतरी शहर के रिसाईपारा वार्ड के गृहणी श्रीमती सरिता साहू अड़बड़ खुश हे, काबर के घर बइठे वोखर पैन कार्ड बनाए के प्रक्रिया मितान ह आके पूरा कर दीस। वो मगन होके प्रदेश के मुख्यमंत्री श्री भूपेश बघेल के धन्यवाद देवत हे कि मुख्यमंत्री मितान योजना हम गृहणी मन संग आम मनखे मन बर वरदान ले कम नइ हे, काबर के एखर जरिए जरूरी सेवा नागरिक मन ल घर बइठे मिलत हे। ओ ह बताईस के पैन कार्ड बनाए बर टोल फ्री नंबर 14545 म कॉल करे म मितान वोखर घर पहुंचिस अऊ ओखर जरूरी कागद सकेल के पैन कार्ड बनाए ऑनलाइन पंजीकरण करिस। मितान ह बताइस के पंजीकरण प्रक्रिया पूरा होए के बाद तय समय म देहे गए पता म पैन कार्ड आ जाही। पैनकार्ड बनाए के प्रक्रिया आसान होए ले श्रीमती साहू खुश होके कहिस के पैनकार्ड बर ओ ल कार्यालय मन म जाय के जरूरत नइ परिस।
जानबा हे कि मुख्यमंत्री मितान योजना के तहत 16 प्रकार के नागरिक सेवा मितान मन घर पहुंचके प्रदान करत हें। धमतरी नगर निगम म मितान मन अब तक 2223 मनखे मन ल लाभान्वित करे हें। पहिली जिहां 15 नागरिक सेवा मूल निवास प्रमाण पत्र, जाति प्रमाण पत्र, आय प्रमाण पत्र, कागद के नकल बर अनुरोध, गैर-डिजिटाइज्ड (भूमि रिकॉर्ड आदि के प्रति), जन्म-मृत्यु प्रमाण पत्र, विवाह पंजीकरण अऊ प्रमाण पत्र, दुकान पंजीकरण, जमीन के जानकारी, जन्म प्रमाण पत्र सुधार, मृत्यु प्रमाण पत्र सुधार, विवाह प्रमाण पत्र सुधार, आधार कार्ड म मोबाइल नंबर अपडेटेशन अऊ पांच साल तक के उमर के लइका मन के आधार बनाय जाना आदि सुविधा मन ल सामिल करे गए रहिस। प्रदेश सरकार के चार साल पूरा होए के उपलक्ष्य म गौरव दिवस 17 दिसम्बर 2022 के मुख्यमंत्री श्री भूपेश बघेल ह मितान योजना म एक अऊ सेवा जोड़े के सौगात दीन, वो हे पैनकार्ड बर पंजीयन। एखर तहत मितान घर आके पैनकार्ड बनाए खातिर जरूरी कागद सकेल के आगू पंजीकरण के प्रक्रिया पूरा करथे। श्रीमती सरिता साहू संग धमतरी शहर के अब तक आठ मनखे मन के पैनकार्ड बर पंजीकरण करे गए हे। एखर बर जरूरी कागद के तौर म आधार कार्ड अऊ दू पासपोर्ट आकार के फोटो लेहे जात हे।