कमईलिन लछवंतीन के बेटा के भविष्य गढ़े के चिंता होईस दूर

धमतरी, एक दाई के सबले बड़का सपना अपन लइका के भविष्य ल बेहतर अऊ सुरक्षित बनाए के होथे। श्रमिक वर्ग के मां मन के ये सपना ल साकार करे म प्रदेश सरकार के मिनीमाता महतारी जतन योजना अहम भूमिका निभावत हे। योजना के तहत मिलइया 20 हजार रूपिया के एकमुश्त राशि ले श्रमिक परिवार के लइका मन के भविष्य ल संवारे म अड़बड़ मदद मिलत हे। दिहाड़ी श्रमिक लछवंतीन साहू घलोक अपन छै महिना के बेटा मोक्ष के भविष्य ल लेके अब जादा चिंतित नइ हे, काबर के ये योजना के तहत ओ ल श्रम विभाग कोति ले 20 हजार रूपिया के राशि मिले हे जेन वोखर बेटा के भावी जीवन बर सहारा बने हे।
दानीटोला वार्ड के रहवईया लछवंतीन साहू संगठित कर्मकार कल्याण मण्डल के तहत पंजीकृत दिहाड़ी श्रमिक हे, जेन घर बनाए के काम म रेजा के काम करथे। वोखर पति सुभाष साहू घलोक मजदूर हे। पउर साल 28 अगस्त 2022 के लईका होईस जेखर नाम मोक्ष रखे गीस। जनम के संगेच ओखर भविष्य के चिंता दाई ल सताए लगीस। एही बीच ओ ल पता चलिस कि श्रम विभाग म मिनीमाता महतारी जतन योजना के तहत पंजीकृत श्रमिक मन ल आर्थिक सहायता राशि प्रदाय करे जाथे। त इमन एखर बर आवेदन दीन अऊ ऊंखर खाता म 20 हजार रूपिया के राशि जमा हो गे। श्रमिक परिवार बर ये राशि बहुत बड़े हे। भावुक होके लछवंतीन ह कहिस कि ‘मिनीमाता महतारी जतन योजना के तहत मिले 20 हजार रूपिया ल वो बैंक खाता म तब तक जमा रखही, जब तक बेटा मोक्ष बड़े नइ हो जाय।‘ वो ह बताइस कि ये राशि ल वो अपन बेटा के भविष्य ल सुरक्षित करे म उपयोग करही। शासन के ये योजना हमन गरीब अऊ दिहाड़ी श्रमिक मन बर वरदान सिद्ध हो गए हे। श्रीमती साहू ह प्रदेश सरकार के प्रति आभार प्रकट करत कहिस कि ‘मौजूदा सरकार हम श्रमिक मन बर सकारात्मक सोच रखथे, ये बहुत बड़े बात हे। ये योजना ले हमला अउड़बड़ राहत मिले हे।‘