धमतरी, छत्तीसगढ़ के गांव-घर तक साफ, सुरक्षित अऊ भरपूर पिए के पानी पहुंचाय म धमतरी जिला ह नवा इतिहास रचे हे। ‘जल जीवन मिशन’ के बढ़िया क्रियान्वयन के सेती धमतरी ह पूरा राज्य म पहिली नंबर पाके मिसाल बनाए हे। जिला के कुल 622 गांव म ले लगभग 530 गांव म ‘हर घर जल’ के लक्छ पूरा हो चुके हे, जेकर से 85 प्रतिशत ले जादा ग्रामीण आबादी ल सोझ नल कनेक्शन ले साफ पानी मिलत हे।
भू-जल स्तर के गिरे अऊ घाम के दिन म पानी के संकट ले निपटे बर जिला म चार बड़े मल्टी विलेज स्कीम (बहुग्रामीय जल प्रदाय योजना) म तेजी ले काम चलत हे, जेकर ले 219 गांव ल फायदा मिलही। एमा सिर्री योजना (कुरुद) के 84 गांव, मेघा योजना (मगरलोड) के 59 गांव, सांकरा योजना (नगरी) के 40 गांव अऊ घटुला योजना (नगरी) के 36 गांव सामिल हवंय। ए बड़े योजना मन ले पक्का जल स्रोत मन ले पाइपलाइन बिछाके उहां पानी पहुंचाय जाही, जिहां घाम के दिन म पानी के भारी किल्लत रहय।
गांव के दुरिहा हेंडपंप अऊ कुंआ ले मूड़ म मटका बोहे के झंझट खतम होय ले महिला मन के समे अऊ मिहनत दुनो बचिस। अब ए समे के उपयोग ओमन आजीविका, स्वरोजगार अऊ लइका मन के संभार म करत हवंय। संग म लइका मन ल पानी भरे के भागदौड़ ले फुरसत मिले ले पढ़े-लिखे अऊ खेल-कूद बर पूरा समे मिलत हे। कलेक्टर ह ए उपलब्धि ल मैदानी अमला, पंचायत प्रतिनिधि अऊ गांव वाले मन के जम्मो मिहनत के नतीजा बताइन। बांचे गांव मन ल घलो जल्दी जोड़के धमतरी ल शत-प्रतिशत ‘हर घर जल’ वाला जिला बनाए बर लगातार निगरानी करे जावत हे।
जल जीवन मिशन म धमतरी के डंका, छत्तीसगढ़ म पाइस पहिला नंबर, 530 गांव म पहुंचिस ‘हर घर जल’
