संग्रहण केंद्र मन म मौसम, मुसुवा अऊ दियांर मन ले होवईया फसल-बरबादी ल रोके 7 हजार 606 पक्का चबूतरा के निर्माण
मुख्यमंत्री श्री भूपेश बघेल के पहल म अपनाए गीस सस्ता, परंपरागत अऊ अनूठा तरकीब
रायपुर, 11 फरवरी 2021। फसल संरक्षण के सस्ता, परंपरागत अऊ अनूठा तरकीब अपनात छत्तीसगढ़ ह एक पंथ अऊ कई काज के कहावत ल चरितार्थ कर देखाए हे। हर साल संग्रहण केंद्र मन म खरीदे गए अड़बड़ अकन धान जिहां नमी, बारिश, ओलावृष्टि, चूहा अऊ दीमक के सेती खराब हो जात रहिस, उहें ये पईत ये क्षति ल रोके बर ए केंद्र मन म विशेष प्रकार के पक्का चबूतरा मन के निर्माण करे गए हे। कोरोना-काल के समय ए चबूतरा मन के निर्माण महात्मा गांधी राष्ट्रीय रोजगार गारंटी योजना के तहत करे गए हे। एखर से बड़का पैमाना म रोजगार के अवसर घलव मिले हे।
मुख्यमंत्री श्री भूपेश बघेल के पहल म छत्तीसगढ़ म ये साल किसान मन ले खरीदे गए धान ल सुरक्षित रखे बर ये नवा व्यवस्था करे गए हे। सबो जिला मन म कुल 7606 चबूतरा मन के निर्माण करे गए हे। राज्य शासन ह समर्थन मूल्य म ये साल रिकॉर्ड 93 लाख मीटरिक टन ले जादा के धान खरीदी करे हे। छत्तीसगढ़ के अलग राज्य बने के बाद ले किसान मन ले ये सबले जादा धान के खरीदी होए हे। अतका बड़े मात्रा म खरीदे गए धान ल सुरक्षित रखना घलोक बड़का चुनौती हे। धान संग्रहण केंद्र मन म ये साल अड़बड़ अकन बनाय गए पक्का चबूतरा मन ले ए धान ल सुरक्षित रखे म भरपूर मदद मिलत हे। हर एक चबूतरा म तीन-तीन हजार बोरी रखे जा सकत हे। संग्रहण केन्द्र मन म जरूरत के मुताबिक खाद्य, नागरिक आपूर्ति अउर उपभोक्ता संरक्षण विभाग के मानक के मुताबिक एखर बर 10.6 मीटर लंबा अऊ साढ़े सात मीटर चौड़ा के चबूतरा बनाय गए हे। दू-दू लाख रूपिया के लागत ले बनाय गए ए चबूतरा मन म भविष्य म शेड लगाय बर आठ पेडेस्टल के संग बोल्ट अऊ प्लेट के घलोक प्रावधान करे गए हे। चबूतरा मन म आर.सी.सी. फर्रस के तरी रेती के भराई अउर चूहा ले बचाव बर चारों कोति छज्जा घलोक बनाय गए हे।
धान ल सुरक्षित रखे बर बालोद जिला के कई ठन संग्रहण केंद्र मन म कुल 378, बलौदाबाजार-भाटापारा म 597, बलरामपुर-रामानुजगंज म 85, बस्तर म 221, बेमेतरा म 430, बीजापुर म 123, बिलासपुर म 380, दंतेवाड़ा म 22, धमतरी म 333, दुर्ग म 132, गरियाबंद म 254, गौरेला-पेंड्रा-मरवाही म 60, जांजगीर-चांपा म 711, जशपुर म 47, कांकेर म 363, कबीरधाम म 269, कोंडागांव म 114, कोरबा म 157, कोरिया म 76, महासमुंद म 488, मुंगेली म 351, नारायणपुर म 32, रायगढ़ म 469, रायपुर म 786, राजनांदगांव म 465, सुकमा म 66, सूरजपुर म 118 अऊ सरगुजा म 79 पक्का चबूतरा के निर्माण करे गए हे।