मुख्यमंत्री के हुकुम म धान खरीदी के सबो जरूरी तियारी हो गए हे पूरा
राज्य म 2739 सरकारी धान ठीहा मन म किसान मन ले समर्थन मूल्य म होही धान खरीदी
14 नवंबर 2024 ले 31 जनवरी 2025 तक किसान मन कर सकही धान के समर्थन मूल्य म विक्रय
राज्य के मेड़ो मन म अवैध धान परिवहन उपर रखे जाही जबर निगरानी
रायपुर, राज्य म समर्थन मूल्य म धान के खरीदी आ 14 नवंबर ले चालू होवत हे। प्रदेश के किसान मन ले धान खरीदी के योजना सरकार के सबले जरूरी काम मन म हे। मुख्यमंत्री श्री विष्णुदेव साय के दिशा निर्देश म प्रदेश के सबो 2739 सरकारी धान ठीहा मन म समर्थन मूल्य म धान खरीदी बर जरूरी तैयारी पूरा कर लेहे गए हे। ए खरीफ सीजन बर प्रदेश म पंजीकृत किसान मन के संख्या 27 लाख 1 हजार 109 हे। ए साल 1 लाख 35 हजार 891 नवा किसान पंजीकृत होए हें अऊ 1 लाख 36 हजार 263 हेक्टेयर नवा रकबा के पंजीयन होए हे।
सबो सरकारी धान ठीहा मन म बायोमैट्रिक डिवाईस के माध्यम ले उपार्जन के व्यवस्था करे गए हे। लघु, सीमांत अऊ बडे़ किसान मन के संग उपजाए गे धान ल निरधारित समर्थन मूल्य म खरीदे जाही। एखर बर 7 नवंबर ले ही टोकन आवेदन के व्यवस्था सुरू कर दे गए रहिस। खरीदी सीजन म लघु अउ सीमांत कृषक मन ल 2 टोकन अउ बडे़ कृषक मन ल 3 टोकन के पात्रता होही।
धान खरीदी अवधि 14 नवंबर 2024 ले 31 जनवरी 2025 के बीच किसान अपन फसल सरकारी धान ठीहा म लाके समर्थन मूल्य म विक्रय कर सकत हें। सरकारी धान ठीहा मन म तौल बर इलेक्ट्रानिक कांटा-बांट के व्यवस्था करे गए हे। सरकारी धान ठीहा ले धान के उठाव मिलर अउ परिवहनकर्ता के माध्यम ले समयानुसार कराए के निर्देश देहे गये हे। सबो सरकारी धान ठीहा म भरपूर बारदाना के व्यवस्था ले लेके छांव, पानी आदि के व्यवस्था ठउका करे गए हे।
सरकारी धान ठीहा म शिकायत अउ निवारण बर हेल्प लाइन नंबर घलोक चस्पा कर दे गये हे। विपणन संघ मुख्यालय स्तर म शिकायत निवारण बर कंट्रोल रूम के स्थापना घलोक करे गए हे जेखर नं. 0771-2425463 हे। धान बेचइया किसान मन ल समय म भुगतान बर मार्कफेड कोति ले राशि के व्यवस्था कर ले गए हे। समिति मन म राशि आहरण बर ‘‘माइक्रो एटीएम’’ के व्यवस्था घलोक देहे जात हे, जेखर से किसान मन ल सुविधा होवय। किसान मन कोति ले समिति म धान विक्रय के 72 घंटा के भीतर राशि किसान मन के बैंक खाता म अंतरित कर देहे जाही। खाद्य मंत्री श्री बघेल के निर्देश म धान रिसाइकलिंग बोगस खरीदी म नियंत्रण बर अपर मुख्य सचिव के अध्यक्षता म राज्य स्तरीय टीम ह राज्य के अलग अलग संभाग म विशेष कार्ययोजना बनाय हे।
