- धान खरीदी एक दिसम्बर ले 15 फरवरी तक
- मुख्यमंत्री सामिल होइन पंच-सरपंच, किसान सम्मेलन अऊ आभार कार्यक्रम म
- छत्तीसगढ़ के विकास बर राशि के कमी नइ होवय
- स्व. श्रीमती इंदिरा गॉधी के जयंती म उनला सुरता करिन
रायपुर, मुख्यमंत्री श्री भूपेश बघेल ह आज बालोद जिला के डौण्डी विकासखण्ड के ग्राम सिंघोला म आयोजित पंच-सरपंच, किसान सम्मेलन अऊ आभार कार्यक्रम ल संबोधित करत कहिन कि किसान मन के धान 2500 रूपिया प्रति कुंटल के दर ले खरीदे जाही। धान के खरीदी एक दिसम्बर ले 15 फरवरी 2020 तक करे जाही। ताकि किसान मन ल कोनो परेशानी झन होवय। मुख्यमंत्री ह कहिन कि छत्तीसगढ़ के विकास बर राशि के कमी नइ होवय।
ये बेरा म गृहमंत्री श्री ताम्रध्वज साहू, कृषि मंत्री श्री रविन्द्र चौबे, खाद्य मंत्री व जिला के प्रभारी मंत्री श्री अमरजीत भगत, महिला एंव बाल विकास मंत्री श्रीमती अनिला भेंडिया, संजारी बालोद विधायक श्रीमती संगीता सिन्हा, गुण्डरदेही विधायक श्री कुंवर सिंह निषाद, पूर्व विधायक श्री भैय्याराम सिन्हा कार्यक्रम म उपस्थित रहिन।
मुख्यमंत्री श्री बघेल ह देश के पूर्व प्रधानमंत्री स्व. श्रीमती इंदिरा गॉधी के जयंती के अवसर म ऊंखर व्यक्तित्व अऊ कृतित्व म प्रकाश डालत कहिन कि उमन आजीवन गरीब अऊ समाज के कमजोर वर्ग के उत्थान बर काम करिन अऊ देश के एकता अऊ अखण्डता के रक्षा बर अपन जीवन न्यौछावर कर दीन। उमन चुनौतीपूर्ण परिस्थिति मन म देश के कुशलतापूर्वक नेतृत्व करत अन्तर्राष्ट्रीय पटल म भारत ल प्रतिष्ठापूर्ण स्थान देवाइन। मुख्यमंत्री ह कहिन कि श्रीमती गॉधी ह बैंक मन के राष्ट्रीयकरण, राजा मन के प्रिवीपर्स के समाप्ति जइसे कठोर निर्णय लीन। बंग्लादेश के उदय, भारत के परमाणु शक्ति पूरा राष्ट्र बनना उंखर प्रमुख उपलब्धि रहिस। श्रीमती इंदिरा गॉधी बचपन ले देश के स्वतंत्रता संग्राम म सक्रिय रहिन।
मुख्यमंत्री ह कहिन कि प्रदेश ले कुपोषण ल समूल नष्ट करे बर मुख्यमंत्री सुपोषण अभियान चलाय जात हे। मुख्यमंत्री हाट-बाजार क्लीनिक योजना ले गांव वाले मन ल निःशुल्क इलाज करे जात हे। मुख्यमंत्री ह कहिन कि सरकार सबले पहिली किसान मन के ऋण माफ करिस, पच्चीस सौ रूपिया प्रति कुंटल के दर ले किसान मन के धान खरीदिस एखर से किसान मन के आर्थिक स्थिति म सुधार होइस अऊ क्रय शक्ति बाढ़ीस। उमन कहिन कि छत्तीसगढ़ म कोनो मंदी नइ हे। सराफा, आटोमोबाईल के बिक्री म बिक्कट वृद्धि होए हे। मुख्यमंत्री ह किसान मन ले अपील करिन कि कोनो किसान पैरा ल खेत मे झन जलावंय, बल्कि पैरा ल गौठान म दान करयं। पैरा जलाए ले जमीन के उर्वरा शक्ति घटथे अऊ कृषि लागत घलोक बाढ़थे। उमन कहिन कि सरकार पहली पइत हरेली, तीजा, विश्व आदिवासी दिवस अऊ कर्मा जयंती म शासकीय छुट्टी देहे के फैसला करिस। मुख्यमंत्री ह कहिन कि डॉ. नरेन्द्र देव वर्मा के लिखे गीत अरपा पैरी के धार…. ल हमन राजगीत बनाउ हन।
कार्यक्रम ल जिला के प्रभारी मंत्री श्री अमरजीत भगत अऊ महिला अऊ बाल विकास अऊ समाज कल्याण मंत्री श्रीमती अनिला भेंडिया ह घलोक सम्बोधित करिन। कलेक्टर श्रीमती रानू साहू ह जिला म होए विकास ले संबंधित प्रतिवेदन प्रस्तुत करिस। ये बेरा म जिला के बहुत अकन जनप्रतिनिधि, सरपंच, पंच, किसान, गणमान्य नागरिक, कई ठन विभाग मन के वरिष्ठ अधिकारी अऊ बड़ी संख्या म ग्रामीण मौजूद रहिन।
