- मुख्यमंत्री के निर्देश म धान खरीदी के व्यवस्था ल चाक-चौबंद करे मुख्य सचिव पहुंचिन खरीदी केन्द्र मन म
- धान उपार्जन केन्द्र मन के करिस औचक निरीक्षण
- किसान मन ले चर्चा करके व्यवस्था के लीन जानकारी
रायपुर, मुख्यमंत्री श्री भूपेश बघेल ह कहिन हें कि प्रदेश के किसान मन ल कोनो प्रकार के चिंता करे के जरूरत नइ हे। राज्य सरकार पूरा धान खरीदही। किसान मन ल समय म भुगतान होवत हे। धान खरीदी के संबंध म फैलाए जात अफवाह मन ले आप मन दूर रहव। मुख्यमंत्री श्री बघेल के निर्देश म धान खरीदी के व्यवस्था ल चाक-चौबंद करे राज्य के मुख्य सचिव श्री आर.पी. मण्डल अधिकारी मन के संग आज भिनसरहा पड़ोसी राज्य मन के सीमा ले लगे ईलाका मन के संगेच राजनांदगांव, जांजगीर-चांपा, बिलासपुर, मुंगेली, कवर्धा जिला के कई धान खरीदी केन्द्र मन म पहुंचिन। मुख्यमंत्री ह सबो जिला कलेक्टर मन ल ये ताकीद दीए हें कि किसान मन ल धान बेचे म कोनो दिक्कत नइ होना चाही। धान खरीदी केन्द्र मन म सबो जरूरी व्यवस्था दुरूस्त रखे जाय अऊ किसान मन ल भुगतान समय म होना चाही।
हम आप ल बता देवन के प्रदेश म एक दिसम्बर 2019 ले 06 दिसम्बर 2019 तक पहिलिचहफ्ता म एक लाख 73 हजार 491 किसान मन ले 7 लाख 11 हजार 306 मैट्रिक टन धान के खरीदी करे गए हे। धान विक्रय करइया एक लाख 26 हजार 897 किसान मन ल 700 करोड़ रूपिया ले जादा के भुगतान करे जा चुके हे।
मुख्यमंत्री श्री बघेल के निर्देश म मुख्य सचिव आज हेलीकाप्टर ले अधिकारी मन के संग भिनसरहा साढ़े आठ बजे ले निरीक्षण चालू करत राजनांदगांव जिला के चिरचारी, कवर्धा जिला के रेंगाखार, मुंगेली जिला के पंडरभट्टा, बिलासपुर जिला के कोटा-पिपरसरई-भरारी-नेवरा, जांजगीर-चांपा जिला के चारपारा स्थित धान खरीदी केन्द्र मन के निरीक्षण करिन। निरीक्षण के समय उमन सीधा किसान मन ले बात-चीत करके धान खरीदी व्यवस्था के बारे म जानकारी लीन। किसान मन ह बताइन कि धान खरीदी केन्द्र मन म किसान मन ल पूरा सहयोग देहे जात हे। श्री मंडल ह धान खरीदी केन्द्र मन म किसान मन के पंजीयन अऊ भुगतान के संबंध म दर्ज करे जात ऑनलाईन जानकारी घलोक देखिन। रेंगाखार म किसान ह बताइस कि मोबाइल म पइसा खाता म जमा होए के मैसेज आए हे। पंडरभट्टहा मुंगेली म वयोवृद्ध किसान घलोक उहां टोकन म धान बेचत मिलिस।
मुख्य सचिव श्री मंडल ह राज्य के किसान मन ले कहिन कि धान खरीदी अभियान के तहत किसान मन ले केन्द्र कोति ले निरधारित समर्थन मूल्य म धान के खरीदी करे जात हे। केन्द्र शासन कोति ले कॉमन धान बर 1815 अऊ ग्रेड-ए धान बर 1835 रूपिया के समर्थन मूल्य निरधारित करे गए हे। खरीदी के रकम किसान मन के खाता म सीधा जमा करे जात हे। उमन बताइस कि मुख्यमंत्री ह प्रदेश के किसान मन ल आश्वस्त करे हें कि राज्य सरकार कोति ले अपन घोषणा पत्र म करे गे वादा के मुताबिक प्रति क्विंटल 2500 रूपिया धान के कीमत देही। समर्थन मूल्य म धान के खरीदी के बाद अंतर के राशि के भुगतान नवा योजना बनाके किसान मन के खाता म करे जाही। उमन ये घलोक स्पष्ट करे हें कि राज्य सरकार प्रति एकड़ 15 क्विंटल के मान ले धान खरीदत हे। ये मां कोनो प्रकार के लिमिट नइ लगाए गए हे। किसान कोनो प्रकार के अफवाह या भ्रामक बात म झन आवंय अऊ हरहिंछा धान खरीदी केन्द्र मन म धान बेचे जावंय। उमन किसान मन ले आग्रह करिन कि धान खरीदी केन्द्र मन म धान लात बेरा ये देख लव कि धान म नमी के प्रतिशत निरधारित सीमा ले जादा झन होवय। धान बेचे ले पहिली खलिहान म बने सहिन सुखा लेवव।
