मनेन्द्रगढ़ (MCB)Digital News Desk, सरकार के आँखी मा धूर्रा झोंक के अवैध धान बेचइया एक बड़का गिरोह के भंडाफोड़ होय हे। मनेन्द्रगढ़-चिरमिरी-भरतपुर (MCB) जिला के नागपुर मंडी मा अधिकारी मन फिलिम स्टाइल मा जाल बिछा के एक कोचिया ला रंगे हाथ धर लिन। ये कोचिया ह सरकार ला 3 लाख रुपिया के चुना लगाए के फिराक मा रिहिस।
कइसे खुलिस पोल?
मामला 1 दिसम्बर के हरे। पटवारी अउ अधिकारी मन जब टोकन के जाँच करत रिहिन, त ‘सोहन’ नाम के एक किसान ले पूछताछ करिन। सोहन ह डर के मारे सच उगल दीस। वो बताइस के “साहब, मोर खेत मा त बोवाई-कटाई कुछू नइ होय हे।” ओकर कहना रिहिस के नागपुर के रहइया संदीप जायसवाल ह ओला पइसा के लालच दे के ओखर पासबुक अउ एटीएम रख ले हे अउ ओखर नाम ले धान बेचे के सेटिंग जमाए हे।
अइसे बिछिस जाल: अधिकारी मन सोहन ला चुप रहे के सलाह दीन। योजना के मुताबिक, जब 2 दिसम्बर के संदीप जायसवाल ह ट्रेक्टर मा भर-भर के धान मंडी लावत रिहिस, त अधिकारी मन ओला धर दबोचिन।
पहली खेप मा: 124 बोरा
दूसर खेप मा: 120 बोरा
कुल मिला के ओमन 96.80 कुंटल (करीब 3 लाख रुपिया के) धान खपाए के तैयारी मा रिहिन। प्रसासन ह तुरंत पूरा धान अउ सोनालिका ट्रेक्टर ला जप्त कर लेहे हे अउ कोचिया संदीप के खिलाफ पंचनामा बना के कड़ी कार्रवाई सुरु कर देहे हे। प्रसासन के ए कार्रवाई ले अवैध धान बेचइया मन मा हड़कंप मच गे हे।
