बिलासपुर : किसान के नाम म धान बेचत बिचौलिया रंगे हाथ पकड़ाइस

बिलासपुर, कोटा विकासखण्ड के करगीखुर्द उपार्जन केन्द्र म किसान के नाम म धान बेचे के उदीम करत एक बिचौलिया पकड़ाए हे। ओखर से तीन किसान मन के नाम म धान बेचे लाये 152 बोरी धान कट्टा जब्त करके प्रकरण दर्ज कर ले गए हे। कलेक्टर सौरभकुमार के निर्देश म कोटा एसडीएम हरिओम द्विवेदी के अगुवई म निरीक्षण टीम ह धरपकड़ के कार्रवाई करे गीस। जानबा हे के करगीखुर्द केन्द्र म आज तीन किसान मन के नाम म 60.80 क्विंटल बर टोकन काटे गए रहिस। ये मां किसान त्रिभुवन जगत के 30 क्विंटल, द्वारिका केंवट के 14.80 क्विंटल अउ शारदा बाई जायसवाल के 16 क्विंटल धान सामिल हे।
जांच म धान किसान के जगा बिचौलिया राजीव लोचन जायसवाल ह लाए हे ऐ पाए गीस। बाद म संबंधित किसान खरीदी केन्द्र पहुंचिन। उमन बयान म बताइन के ये धान उंखर नो हे। बिचौलिया ह उंखर पर्ची लेके धान बेचे जात हे अइसे बताए गीस। ये प्रकरण म पंचनामा तियार करे गीस अऊ धान जब्त करके सेवा सहकारी समिति करगीखुर्द ल सुपुर्द करे गीस। मामला म आगू के कार्रवाई बर प्रकरण जिला कलेक्टर ल भेजे जात हे। निरीक्षण टीम म नायब तहसीलदार रमेश कुमार, सहकारिता सीईओ दुर्गेश साहू संग आन अधिकारी उपस्थित रहिन।