बालोद, खरीफ विपणन साल 2025-26 म समर्थन मूल्य म सुचारू अऊ पारदर्शी धान खरीदी ठउका करे खातिर जिला प्रशासन एक्शन मोड म हे। अवैध धान भंडारण अऊ परिवहन रोके खातिर प्रशासन कोति ले सरलग सघन अभियान चलाय जात हे। प्रशासन के इही मुहिम के तहत आज कृषि उपज मंडी बालोद के उड़न दस्ता टीम ह कई गांव मन म एक बड़का कार्रवाई करत भारी मात्रा म अवैध धान जब्त करे गीस।
तहसीलदार आशुतोष शर्मा ह बताइस के मंडी अधिनियम के अंतर्गत अब तक कुल 06 प्रकरण दर्ज करके 218 क्विंटल धान जब्त करे जा चुके हे। उड़न दस्ता टीम ह बालोद तहसील के कई ठन गांव मन म छापेमारी करके अवैध भंडारण के खुलासा करिस।
आज के कार्रवाई में—
ग्राम लिमोरा ले 22 क्विंटल
लोण्डी ले 40 क्विंटल
पोण्डी ले सबसे जादा 99 क्विंटल
भेड़िया नवागांव ले 32 क्विंटल
बेलमांड़ ले 24 क्विंटल
धान अवैध रूप ले जमा पाए गीस। टीम ह मौका म जांच करके सबो मामला म प्रकरण दर्ज करिस अऊ जरूरी कार्यवाही शुरू कर देहे हे।
प्रशासन के सरलग होवत ए कार्रवाइ मन के उद्देश्य ये ठउका करना हे के राज्य के धान खरीदी व्यवस्था म कोनो मनखे अवैध गतिविधि मन के माध्यम ले व्यवधान झन डाल सकय। हर साल खरीदी सीजन म कुछ मनखे अनधिकृत धान खरीद-बिक्री अऊ भंडारण म सामिल होथे, जेखर से न केवल सरकारी व्यवस्था प्रभावित होथे, बल्कि सही किसान मन ल घलोक नुकसान उठाना परथे।
इही ल देखत जिला प्रशासन ह ए साल पहिली ले जादा कड़क निगरानी अऊ तेज कार्रवाई के फैसला लेहे हे। उड़न दस्ता टीम गांव, सड़क अऊ संदिग्ध स्थल म नियमित जांच करत हे, ताकि कोनो प्रकार के अनियमितता ल तुरंत रोके जा सकय।